തിരുവനന്തപുരം: വേങ്ങരയിലെ എ.ആര്‍ നഗറില്‍ ദേശീയപാതയുടെ സ്ഥലമെടുപ്പിനെതിരേ സമരം നടത്തിയ സാധാരണ ജനങ്ങളെ കള്ളക്കേസില്‍ കുടുക്കി വേട്ടയാടുകയും പീഡിപ്പിക്കുകയും ചെയ്യുന്ന പൊലിസ് നടപടി ഉടന്‍ അവസാനിപ്പിക്കണമെന്നാവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല ഡി.ജി.പിക്ക് കത്ത് നല്‍കി.
പ്രശ്‌നത്തിന് പരിഹാരമുണ്ടാക്കാന്‍ 11ന് സര്‍വകക്ഷി യോഗം വിളിച്ചിരിക്കുകയാണ്. ഇതിനായി സമാധാനപരമായ അന്തരീക്ഷം ഒരുക്കുന്നതിന് വേണ്ടി പൊലിസ് നടപടികള്‍ നിര്‍ത്തിവയ്ക്കണം. ചില പൊലിസ് ഉദ്യോഗസ്ഥരുടെ അമിതാവേശമാണ് പ്രശ്‌നം ഇത്ര വഷളാക്കിയത്. പൊലിസ് ഇപ്പോഴും വീടുകളില്‍ കയറി റെയ്ഡ് നടത്തുകയും സ്ത്രീകളും കുട്ടികളും ഉള്‍പ്പെടെയുള്ളവരെ ഭീഷണിപ്പെടുത്തുകയും ഉപദ്രവിക്കുകയും ചെയ്യുന്നു.
പൊലിസ് അതിരുവിട്ട അക്രമമാണ് നടത്തിയത്. കിടപ്പാടം നഷ്ടപ്പെടുന്നതിനെതിരേ പ്രതിഷേധിച്ച നിസ്സഹായരായ ജനങ്ങളെ പൊലിസ് ആക്രമിക്കുകയും വീടുകളില്‍ കയറി മര്‍ദിക്കുകയുമാണ് ചെയ്തത്.
അവിടെ ഉണ്ടായ സംഭവങ്ങളില്‍ അന്വേഷണം നടത്തി കുറ്റക്കാരായ പൊലിസ് ഉദ്യോഗസ്ഥര്‍ക്കെതിരേ നടപടി സ്വീകരിക്കണമെന്നും ചെന്നിത്തല കത്തില്‍ ആവശ്യപ്പെട്ടു.

സ്ഥലമെടുപ്പ് നിര്‍ത്തിവയ്ക്കണമെന്ന് സുധീരന്‍

തിരുവനന്തപുരം: ദേശീയപാത വികസനവുമായി ബന്ധപ്പെട്ട് മലപ്പുറം ജില്ലയിലുണ്ടായ പ്രതിസന്ധി സമവായത്തിലൂടെ പരിഹരിക്കപ്പെടുന്നതുവരെ സ്ഥലമെടുപ്പ് നടപടികള്‍ നിര്‍ത്തിവയ്ക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയനും പൊതുമരാമത്ത് മന്ത്രി ജി. സുധാകരനും കോണ്‍ഗ്രസ് നേതാവ് വി.എം സുധീരന്‍ കത്തയച്ചു. 11ന് നടക്കുന്ന സര്‍വകക്ഷിയോഗത്തില്‍ സമരസംഘടനാ പ്രതിനിധികളെ കൂടി പങ്കെടുപ്പിക്കുന്നത് ഉചിതമായിരിക്കുമെന്നും അദ്ദേഹം കത്തില്‍ പറഞ്ഞു.