മലപ്പുറം: 2018 ജനുവരി മുതല്‍ മെയ് 30 വരെ നടക്കുന്ന ആദര്‍ശ കാംപയിന്റെ ഭാഗമായി സമസ്ത മധ്യമേഖല പ്രവര്‍ത്തക സംഗമം 12ന് പട്ടിക്കാട് ജാമിഅ നൂരിയ്യ കാംപസില്‍ നടക്കും. രാവിലെ 8.30ന് ആരംഭിച്ച് വൈകിട്ട് അഞ്ചിന് സമാപിക്കുന്ന സംഗമം സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. 

നേര്‍മാര്‍ഗത്തിന്റെ സത്യസാക്ഷ്യം, വ്യതിയാനത്തിന്റെ അനന്തര ഫലങ്ങള്‍, സമസ്ത ശതാബ്ദിയിലേക്ക് സെഷനുകളും കര്‍മ പദ്ധതി അവതരണവും സംഗമത്തില്‍ നടക്കും. മലപ്പുറം, പാലക്കാട്, തൃശൂര്‍, നീലഗിരി ജില്ലകളിലെ മഹല്ല്-സ്ഥാപന ഭാരവാഹികളും ഖത്വീബുമാരും സമസ്തയുടെയും പോഷക ഘടകങ്ങളുടെയും മണ്ഡലം-ജില്ലാ-സംസ്ഥാന കൗണ്‍സിലര്‍മാരും പഞ്ചായത്തില്‍ നിന്ന് തെരഞ്ഞെടുക്കപ്പെട്ട പ്രതിനിധികളും സംഗമത്തില്‍ പങ്കെടുക്കണമെന്ന് സംഘാടക സമിതി ചെയര്‍മാന്‍ പാണക്കാട് സയ്യിദ് സാദിഖലി ശിഹാബ് തങ്ങളും കണ്‍വീനര്‍ അബ്ദുസമദ് പൂക്കോട്ടൂരും അറിയിച്ചു.