തിരൂരങ്ങാടി: എസ്.എം.എഫ് സംസ്ഥാന കമ്മിറ്റിയുടെ ആഭിമുഖ്യത്തില്‍ നടത്തുന്ന മഹല്ല് പ്രവര്‍ത്തന പദ്ധതി ദൃശ്യാവിഷ്‌കാരം ലൈറ്റ് ഓഫ് മദീന, ഏപ്രില്‍ 20,21,22 തിയതികളില്‍ കാസര്‍കോട് ജില്ലയിലെ തൃക്കരിപ്പൂര്‍ കൈതക്കാട് വച്ച് നടക്കുമെന്ന് സംസ്ഥാന പ്രസിഡന്റ് സയ്യിദ് ഹൈദരലി ശിഹാബ് തങ്ങള്‍ ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി ബിരുദദാന സമ്മേളനത്തില്‍ വച്ച് പ്രഖ്യാപിച്ചു.
എസ്.എം.എഫ് സംസ്ഥാന കമ്മിറ്റിയുടെ ആഭിമുഖ്യത്തില്‍ നടപ്പിലാക്കുന്ന വ്യത്യസ്ത കര്‍മ പദ്ധതികള്‍ കണ്ടും കേട്ടും അനുഭവിച്ചും പകര്‍ത്തി മഹല്ലുകളില്‍ നടപ്പിലാക്കുവാന്‍ മഹല്ല് ഭാരവാഹികളെ ശക്തിപ്പെടുത്തുന്നതാണ് ലൈറ്റ് ഓഫ് മദീന. 2017 ല്‍ തൃശൂരിലെ വാദീ ഖുബായില്‍ നടന്ന എസ്.എം.എഫ് നാഷനല്‍ ഡെലിഗേറ്റ്‌സ് മീറ്റിന്റെ തുടര്‍ പ്രവര്‍ത്തനമാണ് ലൈറ്റ് ഓഫ് മദീന. ഇതിന്റെ വിജയത്തിന് എല്ലാ മഹല്ല് ഭാരവാഹികളും മുന്നിട്ടിറങ്ങണമെന്ന് തങ്ങള്‍ ആവശ്യപ്പെട്ടു.