പൊന്നാനി: താലൂക്ക് ആശുപത്രിക്കെതിരേയുള്ള കുപ്രചാരണങ്ങള്‍ അവസാനിപ്പിക്കണമെന്ന് താലൂക്ക് സഭ ആവശ്യപ്പെട്ടു. ദേശീയപാത സ്ഥലമേറെടുപ്പുമായി ബന്ധപ്പെട്ട് ആവശ്യമായ ചര്‍ച്ചകള്‍ നടത്താനും താലൂക്ക് സഭാ യോഗത്തില്‍ തീരുമാനമായി. പൊന്നാനി താലൂക്കില്‍ ഈ മാസം 12 മുതല്‍ ആരംഭിക്കുന്ന സ്ഥലമേറ്റെടുപ്പുമായി ബന്ധപ്പെട്ട് ഭൂമി നഷ്ടമാവുന്നവരുമായി ആവശ്യമായ ചര്‍ച്ചകള്‍ നടത്തും. ആവശ്യമായ മുന്നറിയിപ്പുകള്‍ നല്‍കിയതിനു ശേഷമെ പൊന്നാനി ചന്തപ്പടി മാറി മഹലിനു മുന്നിലെ കല്‍വര്‍ട്ട് പുനര്‍നിര്‍മ്മാണ പ്രവൃത്തികള്‍ നടത്താവൂ എന്നും യോഗം പൊതുമരാമത്ത് വകുപ്പ് അധികൃതര്‍ക്ക് നിര്‍ദ്ദേശം നല്‍കി.
പോര്‍ട്ട് മണലെടുപ്പുമായി നിലനില്‍ക്കുന്ന പ്രശ്‌നങ്ങള്‍ക്ക് പരിഹാരം കാണാന്‍ റിവ്യൂ മീറ്റിങ് ചേരാനും തീരുമാനമായി. താലൂക്ക് സഭയില്‍ പഞ്ചായത്ത് പ്രസിഡന്റുമാരുള്‍പ്പെടെയുള്ളവരുടെ അസാന്നിധ്യം ഗൗരവമായി എടുക്കണമെന്നും യോഗത്തില്‍ നിര്‍ദ്ദേശമുയര്‍ന്നു. നഗരസഭാ ചെയര്‍മാന്‍ സി.പി.മുഹമ്മദ് കുഞ്ഞിയുടെ അധ്യക്ഷതയില്‍ ചേര്‍ന്ന യോഗത്തില്‍ തഹസില്‍ദാര്‍ ജി.നിര്‍മ്മല്‍കുമാര്‍, രാഷട്രീയ കക്ഷി പ്രതിനിധികള്‍, ഉദ്യോഗസ്ഥര്‍ എന്നിവര്‍ പങ്കെടുത്തു.