പെരിങ്ങത്തൂര്‍:കേരളീയസമൂഹം ചര്‍ച്ച ചെയ്യുന്ന പൊള്ളുന്നആനുകാലിക വിഷയങ്ങള്‍ക്കു നിറക്കൂട്ടിലൂടെ പുത്തന്‍ഭാഷ്യമൊരുക്കുകയാണ് പെരിങ്ങത്തൂര്‍ എന്‍.എ.എം ഹയര്‍സെക്കന്‍ഡറി സ്‌കൂള്‍ അധ്യാപകനായ മജീദ് ഒളവിലം.ഇതിനകം ആയിരത്തിലധികം ചിത്രങ്ങള്‍ വരച്ചിട്ടുള്ള മജീദ്
തലശ്ശേരി ബി.ഇ.എം.പി ഹൈസ്‌ക്കൂളിലും, കേരള ലളിത കലാ അക്കാദമി ഹാളിലും ചിത്ര പ്രദര്‍ശനങ്ങള്‍ സംഘടിപ്പിച്ചിട്ടുണ്ട്.
പാനൂര്‍ നഗരസഭ ലോഗോ, ചൊക്ലി എ.ഇ.ഒ അക്കാദമിക് കൗണ്‍സില്‍ ലോഗോ തുടങ്ങിയ നിരവധി ലോഗോകള്‍ മജീദ് രൂപകല്‍പ്പന ചെയ്തതാണ്. സ്‌കൂള്‍ വിദ്യാഭ്യാസത്തിനു ശേഷം ചിത്രരചനയില്‍ സജീവമായ മജീദ് കേരള സ്‌കൂള്‍ ഓഫ് ആര്‍ട്‌സ്, യൂനിവേഴ്‌സല്‍ ആര്‍ട്‌സ് കോഴിക്കോട് എന്നിവ നടത്തിയ മല്‍സരങ്ങളില്‍ ഒന്നാം സ്ഥാനം നേടിയതോടെയാണ് ചിത്രലോകത്ത് ശ്രദ്ധേയനാകുന്നത്.
തലശ്ശേരി പാറാല്‍ അല്‍ ഫിത്‌റ, കടവത്തൂര്‍ മൈത്രി സ്‌പെഷല്‍ സ്‌കൂള്‍ തുടങ്ങിയ വിദ്യാലയങ്ങളിലെ ചുമര്‍ ചിത്രങ്ങള്‍ ഏറെ ആകര്‍ഷിക്കപ്പെട്ടതാണ്.
ജില്ലയില്‍ അധ്യാപക കലോല്‍സവത്തില്‍ മൂന്നാം തവണയും ഒന്നാം സ്ഥാനം മജീദിനായിരുന്നു. കേരള സ്‌കൂള്‍ ഓഫ് ആര്‍ട്‌സ് വിദ്യാര്‍ഥിനിയായ മൂത്തമകള്‍ ഷസ്‌ന പിതാവിന്റെ വഴിയിലൂടെയാണ് യാത്രചെയ്യുന്നത്.
രണ്ടാമത്തെ മകള്‍ ഷംന മജീദ് സംസ്ഥാന സ്‌കൂള്‍ പ്രവൃത്തിപരിചയമേളയില്‍ പ്രക്യതി ദത്ത നാര് കൊണ്ടുള്ള ഉല്‍പന്ന നിര്‍മ്മാണത്തില്‍ എ ഗ്രേഡ് നേടി.
മറ്റൊരു മകള്‍ ഷാന മജീദ് പുല്ലൂക്കര വിഷ്ണു വിലാസം യു.പി സ്‌കൂളില്‍ രണ്ടാം ക്ലാസില്‍ പഠിക്കുന്നു.പുല്ലൂക്കര കാവുപുനത്തില്‍ സമീറയാണ് ഭാര്യ.