മട്ടാഞ്ചേരി: ഫോര്‍ട്ട്‌കൊച്ചി കടപ്പുറത്തെ പോര്‍ട്ടിന്റെ അധീനതയിലുള്ള കയേറ്റങ്ങള്‍ ഒഴിപ്പിച്ചു. ഇന്നലെ രാവിലെ പതിനൊന്ന് മണിയോടെയാണ് പോര്‍ട്ട് ഉദ്യോഗസ്ഥരുടെ നേതൃത്വത്തില്‍ കയേറ്റങ്ങള്‍ ഒഴിപ്പിച്ചത്. വാസ്‌ക്കോഡ ഗാമ സ്‌ക്വയറിന് സമീപത്തെ നടപ്പാതയോട് ചേര്‍ന്ന ഭാഗത്തും തീരത്തുള്ളതുമായ കയേറ്റങ്ങളാണ് ഒഴിപ്പിച്ചത്.
മത്സ്യവില്‍പന ശാലകള്‍ക്ക് സ്റ്റേ ഉള്ളതിനാല്‍ അത് പൊളിച്ചില്ല. മൂന്ന് കടകളും തട്ടുകളുമാണ് നീക്കം ചെയ്തത്. പോര്‍ട്ടിന്റെ അധീനതയിലുള്ള കയേറ്റങ്ങള്‍ ഒഴിപ്പിക്കാന്‍ കോടതി നിര്‍ദേശമുണ്ടായിരുന്നു. പൊലിസിന്റെ സഹായത്തോടെയാണ് കയേറ്റങ്ങള്‍ നീക്കം ചെയ്തത്. ഭൂരിഭാഗം പേരും സ്വയം ഒഴിഞ്ഞ് പോകുകയായിരുന്നു. ഒഴിപ്പിക്കലിനെതിരേ വലിയ പ്രതിഷേധം ഒന്നുമുണ്ടായില്ല.