നിലമ്പൂര്‍: മേലേ കൂറ്റമ്പാറ കെ.എസ്.ബി ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബും ലെറ്റ്‌സ് ഗോ ഹോളിഡേയ്‌സും സംയുക്തമായി മുതിര്‍ന്നവര്‍ക്ക് കോഴിക്കോട്ടേക്ക് സ്വപ്നയാത്ര സംഘടിപ്പിച്ചു കെ.എസ്.ബി ക്ലബിന്റെ കീഴില്‍ ഒരു വര്‍ഷക്കാലം നീണ്ടുനില്‍ക്കുന്ന ഗ്രാമോത്സവം 2018 ന്റെ ഭാഗമായാണ് യാത്ര സംഘടിപ്പിച്ചത്. ജീവിത പ്രാരാബ്ദങ്ങളും മറ്റും കൊണ്ട് ഒന്നിച്ച് യാത്ര പോകാന്‍ പറ്റാത്തവര്‍ ജാതിമതരാഷ്ട്രീയ ഭേദമന്യേ ഒരുമിച്ച് ഒരു ദിവസം ആഘോഷിക്കുക, പ്രായമായവരെ ഉപേക്ഷിക്കുകയും വൃദ്ധ സദനങ്ങളില്‍ ആക്കുകയും ചെയ്യുന്ന യുവതലമുറക്ക് നല്ലൊരു സന്ദേശം നല്‍കുക തുടങ്ങിയവ ലക്ഷ്യമിട്ടാണ് യാത്ര സംഘടിപ്പിച്ചത്.
ജീവിതത്തില്‍ ആദ്യമായി കടല്‍ കാണുന്നവരും ആദ്യമായി ഒരുമിച്ച് യാത്ര പോകുന്നവരും കൂട്ടത്തില്‍ ഉണ്ടായിരുന്നു. ആദ്യമായി ത്രീഡി ദൃശ്യങ്ങള്‍ കാണുകയും പ്ലാനറ്റോറിയം കണ്ടവരും അവരുടെ സന്തോഷം പ്രകടിപ്പിച്ചു.
പ്രായത്തിന്റെ അവശതകള്‍ മറന്ന് കൊച്ചുകുട്ടികളെപ്പോലെ മരച്ചുവട്ടില്‍ ഒരുമിച്ചിരുന്ന് ഭക്ഷണം കഴിക്കുകയും കടല്‍വെള്ളത്തില്‍ നനഞ്ഞു തിമിര്‍ത്താഘോഷിക്കുകയും ചെയ്തു. പൂക്കോട്ടുംപാടം എസ്.ഐ അമൃത രംഗന്‍ ഫ്‌ളാഗ് ഓഫ് ചെയ്തു. പഞ്ചായത്തംഗങ്ങളായ ടി.പി ഹംസ, ഇല്ലിക്കല്‍ കുഞ്ഞിപ്പു, ബാപ്പുട്ടി സഖാഫി, കെ.എന്‍ പ്രസന്നന്‍, കണ്ണത്ത് സുബൈര്‍ തുടങ്ങിയവര്‍ സംബന്ധിച്ചു.
ക്ലബ് സെക്രട്ടറി ഇല്ലിക്കല്‍ മുര്‍ശിദ്, പ്രസിഡന്റ് പാറക്കല്‍ സഞ്ചു, അടുക്കത്ത് ഇര്‍ഷാദ്, ഇല്ലിക്കല്‍ ഹാരിസ്, മുഹമ്മദലി കണ്ണത്ത്, ഉസ്മാന്‍, ഷഹനാദ് എന്നിവര്‍ യാത്രക്ക് നേതൃത്വം നല്‍കി.