നാദാപുരം: വിംസ്‌റോഡില്‍ കാറിലെത്തിയ സംഘവും ഓട്ടോ തൊഴിലാളികളുമായി ഏറ്റുമുട്ടി. ഇന്നലെ വൈകിട്ട് അഞ്ചരയോടെയാണ് സംഭവം. സംഘര്‍ഷത്തില്‍ ഓട്ടോ ഡ്രൈവര്‍ പഴംകൂട്ടത്തില്‍ ജിതേഷിന്‍ പരുക്ക് പറ്റി. ഇദ്ദേഹത്തെ നാദാപുരം താലൂക്ക് ആശുപത്രിയില്‍ പ്രവേശിപ്പിച്ചു.
വിംസ് റോഡിലൂടെ മെയിന്‍ റോഡിലേക്കെത്തിയ കാറില്‍ ഓട്ടോ ഉരസിയെന്നു പറഞ്ഞു തുടങ്ങിയ വാക്കേറ്റമാണ് പിന്നീട് ഏറെ നേരം നീണ്ട അടിപിടിയില്‍ എത്തിയത്. പ്രശ്‌നം അവസാനിപ്പിക്കാന്‍ ട്രാഫിക് ഡ്യുട്ടിയില്‍ ഉണ്ടായിരുന്ന പൊലിസ് എത്തിയെങ്കിലും മദ്യലഹരിയിലായിരുന്ന സംഘം പൊലിസിനെതിരെയും തിരിയുകയായിരുന്നു.
ഇതിനിടയില്‍ ഓട്ടോ ഡ്രൈവര്‍മാരും സംഘടിച്ചെത്തിയതോടെ സംഘര്‍ഷം നിയന്ത്രണാതീതമായി. തുടര്‍ന്ന് നാദാപുരം എസ്.ഐ പ്രജീഷിന്റെ നേതൃത്വത്തില്‍ കൂടുതല്‍ പൊ ലിസുകാരെത്തി ചെറുമോത്തെ തുണ്ടിയില്‍ ഷാജഹാന്‍, വാണിമേല്‍ സ്വദേശി സുബൈര്‍ എന്നിവരെ കസ്റ്റഡിയില്‍ എടുത്ത് അറസ്റ്റ് രേഖപ്പെടുത്തി.പൊലിസിനൊപ്പം വൈദ്യ പരിശോധനക്കെത്തിയ പ്രതികള്‍ ബഹളം വെച്ചതോടെ താലൂക്ക് ആശുപത്രി വളപ്പിലും ജനം തടിച്ചു കൂടി. അരമണിക്കൂറോളം അത്യാഹിത വിഭാഗത്തിലെ പ്രവര്‍ത്തനങ്ങള്‍ തടസ്സപ്പെട്ടു.