സുല്‍ത്താന്‍ ബത്തേരി: ഉള്‍ക്കാട്ടിലേക്ക് തുരത്തിയ വടക്കനാട്ടെ കൊമ്പന്‍ വിണ്ടും നാട്ടിലിറങ്ങി കൃഷി നശിപ്പിച്ചു. പള്ളിവയല്‍ പ്രദേശത്തെ സുരേന്ദ്രന്‍, സുരേഷ് എന്നിവരുടെ നാലേക്കറോളം വരുന്ന കൃഷിയിടത്തിലെ വാഴ, കമുക്, കാപ്പിച്ചെടികള്‍ തുടങ്ങിയവയാണ് ഇത്തവണ നശിപ്പിച്ചത്.
കൃഷിയിടത്തില്‍ നിലയുറപ്പിച്ച കൊമ്പനെ ഓടിക്കാന്‍ ശ്രമിച്ചെങ്കിലും അക്രമസ്വഭാവം പ്രകടിപ്പിക്കുന്നതിനാല്‍ ശ്രമം പരാജയപ്പെടുകായിരുന്നു. വിവരമറിഞ്ഞ് വനംവകുപ്പ് ഉദ്വോഗസ്ഥര്‍ സ്ഥലത്തെത്തി ആനയെ ഓടിക്കാന്‍ ശ്രമിച്ചെങ്കിലും ആന കാടുകയറിയില്ല. ബുധനാഴ്ച്ച പുലര്‍ച്ചെ രണ്ടോടെ കൃഷിയിടത്തിലിറങ്ങിയ ആന രാവിലെ അഞ്ചോടെയാണ് കാട് കയറിയതെന്ന് പ്രദേശവാസികള്‍ പറഞ്ഞു.
നാട്ടുകാരുടെ പ്രതിഷേധത്തെ തുടര്‍ന്ന് കഴിഞ്ഞമാസം ആനയെ മയക്കുവെടിവെച്ച് പിടികൂടി റേഡിയോ കോളര്‍ ഘടിപ്പിച്ച് വിട്ടിരുന്നു. എന്നാല്‍ റേഡിയോ കോളര്‍ ഘടിപ്പിച്ച് വിട്ടതിന് ശേഷവും ആന സ്ഥിരമായി നാട്ടിലിറങ്ങി പ്രശ്‌നങ്ങള്‍ സൃഷ്ടിക്കുകയാണ്. ചൊവാഴ്ച്ചയാണ് കൊമ്പനെ കുങ്കിയാനകളുടെ സഹായത്തോടെ ഉള്‍ക്കാട്ടിലേക്ക് തുരത്തിയത്.
ജനവാസ കേന്ദ്രത്തില്‍ നിന്നും നാല് കിലോമീറ്ററോളം ഉള്‍വനത്തിലേക്കാണ് വനംവകുപ്പ് കൊമ്പനെ തുരത്തിയത്. വൈദ്യുത കമ്പിവേലികള്‍ തകര്‍ത്ത് കൃഷിസ്ഥലങ്ങളില്‍ ഇറങ്ങി നാശനഷ്ടങ്ങള്‍ വരുത്തുന്ന കാട്ടനകള്‍ നാട്ടിലിറങ്ങി കൃഷി നശിപ്പിക്കുന്നത് നിസഹായതയോടെ നോക്കിയിരിക്കാനെ നാട്ടുകാര്‍ക്ക് സാധിക്കുന്നുള്ളൂ. ഇതേതുടര്‍ന്ന് ഇവരുടെ പ്രതിഷേധം കനത്തതോടെയാണ് ആനക്ക് റേഡിയോ കോളര്‍ ഘടിപ്പിച്ചത്. തുടര്‍ന്ന് ആനയുടെ സഞ്ചാരപഥം വനംവകുപ്പ് സിഗ്‌നലുകള്‍ വഴി നിരീക്ഷിക്കുന്നുമുണ്ടായിരുന്നു.
എന്നാല്‍ ആന എല്ലാവരുടെയും കണ്ണുവെട്ടിച്ച് ദിനേനെയെന്നോണം കാടിറങ്ങി കൃഷി നശിപ്പിക്കുകയാണ്. ഉള്‍ക്കാട്ടിലേക്ക് തുരത്തിയിട്ടും വിണ്ടും കൃഷിയിടത്തിലിറങ്ങുന്നത് വനംവകുപ്പ് ഉദ്യോഗസ്ഥര്‍ക്കും നാട്ടുകാര്‍ക്കും ഒരുപോലെ തലവേദന സൃഷ്ടിക്കുന്നുണ്ട്. വനംവകുപ്പിന്റെ സോളാര്‍ഫെന്‍സിങും കര്‍ഷകരുടെ ഫെന്‍സിങും ട്രഞ്ചും മറികടന്നാണ് ആന കൃഷിയിടങ്ങളിലേക്കെത്തുന്നത്.