ഗോള്‍ഡ് കോസ്റ്റ്: ഗുസ്തി താരങ്ങളുടെ മികവില്‍ കോമണ്‍വെല്‍ത്ത് ഗെയിംസിന്റെ എട്ടാം ദിനത്തില്‍ ഇന്ത്യ സ്വന്തമാക്കിയത് രണ്ട് സ്വര്‍ണമടക്കം ഏഴ് മെഡലുകള്‍. പുരുഷവിഭാഗം ഗുസ്തിയില്‍ പ്രതീക്ഷ കൈവിടാതെ സൂപ്പര്‍താരം സുശീല്‍കുമാര്‍ (74 കിലോ), രാഹുല്‍ അവരെ (57 കിലോ) എന്നിവര്‍ സ്വര്‍ണം സ്വന്തമാക്കി.

വനിതാവിഭാഗത്തില്‍ ബബിതകുമാരി (53 കിലോ) വെള്ളിയും കിരണ്‍ ബിഷ്‌നോയ് (76 കിലോ) വെങ്കലവും നേടി. ഷൂട്ടിങ് വനിതാവിഭാഗം 50 മീറ്റര്‍ റൈഫിള്‍ പ്രോണില്‍ തേജസ്വിനി സാവന്ത് വെള്ളി സമ്മാനിച്ചു.

അത്‌ലറ്റിക്‌സ് പോരാട്ടത്തിലും വ്യാഴാഴ്ച ഇന്ത്യക്ക് മെഡല്‍ദിനമായിരുന്നു. വനിതകളുടെ ഡിസ്‌കസ് ത്രോയില്‍ സീമ പൂനിയ വെള്ളിയും നവ്ജീത് ധില്ലന്‍ വെങ്കലവും സ്വന്തമാക്കി. 14 സ്വര്‍ണവും ഏഴ് വെള്ളിയും 10 വെങ്കലവുമായി ഇന്ത്യ 31 മെഡലുകളോടെ മൂന്നാം സ്ഥാനത്ത്.