കര്‍മ്മന്തോടി (കാസര്‍കോട്): വികസനപ്രവര്‍ത്തനങ്ങളില്‍ തടസം നില്‍ക്കുന്നവരുടെ ഇഷ്ടക്കേട് സമ്പാദിച്ചാലും ഭാവിയെക്കരുതി വികസന പ്രവര്‍ത്തനങ്ങളില്‍നിന്ന് പിറകോട്ട് പോകാന്‍ കഴിയില്ലെന്നു മുഖ്യമന്ത്രി പിണറായി വിജയന്‍. കാറഡുക്ക ബ്ലോക്ക് പഞ്ചായത്തിന്റെ ഓഫിസ് കെട്ടിടം ഉദ്ഘാടനം ചെയ്യുകയായിരുന്നു മുഖ്യമന്ത്രി.
സ്ഥലം ഏറ്റെടുത്തു വികസന പ്രവര്‍ത്തനങ്ങള്‍ നടത്തേണ്ട ഒട്ടേറെ കാര്യങ്ങള്‍ ഇവിടെയുണ്ട്. എന്നാല്‍ ചില ആളുകള്‍ അതിനു തടസം നില്‍ക്കുന്നുണ്ട്. നമ്മുടെ നാട്ടില്‍ ആരുടെ കൈവശവും ആവശ്യത്തിലധികം ഭൂമിയില്ല. അങ്ങനെയാകുമ്പോള്‍ വികസനത്തിനായി ഭൂമി വിട്ടു കൊടുക്കേണ്ടിവരുന്നത് പലര്‍ക്കും പ്രയാസമുണ്ടാക്കും.
അതു സര്‍ക്കാര്‍ മനസിലാക്കുന്നു. എന്നുകരുതി പദ്ധതികള്‍ ഉപേക്ഷിക്കാന്‍ കഴിയില്ല. ഭൂമി നഷ്ടപ്പെടുന്നവര്‍ക്ക് അര്‍ഹമായ നഷ്ടപരിപരിഹാരം നല്‍കിയുള്ള പുനരധിവാസം ഉറപ്പുവരുത്തും. അതു സര്‍ക്കാരിന്റെ കടമയാണെന്നും മുഖ്യമന്ത്രി പറഞ്ഞു.