ന്യൂഡല്‍ഹി: കഴിഞ്ഞ ദിവസം രാത്രിയില്‍ ചില ഉത്തരേന്ത്യന്‍ സംസ്ഥാനങ്ങളിലുണ്ടായ കനത്ത മഴയിലും കാറ്റിലും വന്‍നാശനഷ്ടം. ആഗ്രയില്‍ താജ്മഹലിന്റെ പ്രവേശന കവാടത്തിലുള്ള മിനാരം കാറ്റില്‍ തകര്‍ന്നുവീണു. ഉത്തര്‍പ്രദേശിലെ ബ്രാജ് മേഖലയില്‍ 15 പേര്‍ കൊല്ലപ്പെട്ടു. 24പേര്‍ക്ക് പരുക്കേല്‍ക്കുകയും ചെയ്തിട്ടുണ്ട്. ജോന്‍പൂരിനടുത്ത ഷാഹ്ഗഞ്ചില്‍ ഒരു പള്ളിയുടെ തൂണ് തകര്‍ന്നു വീണതായും ദേശീയ ദുരന്ത നിവാരണ സേന അറിയിച്ചു. 

മരിച്ചവരില്‍ രണ്ട് സ്ത്രീകളും രണ്ട് കുട്ടികളും ഉള്‍പ്പെടുന്നതായി ആഗ്ര പൊലിസ് സൂപ്രണ്ട് അമിത് പഥക് പറഞ്ഞു. രാജസ്ഥാനിലും വ്യാപകമായ നാശനഷ്ടങ്ങളാണ് റിപ്പോര്‍ട്ട് ചെയ്യപ്പെട്ടത്. നിരവധി കാര്‍ഷിക വിളകള്‍ നശിച്ചതായും വിവരമുണ്ട്.