തളിപ്പറമ്പ: ഐസ്‌ക്രീമില്‍ വിഷം ചേര്‍ത്ത് യുവതികളെ കൊല്ലാന്‍ ശ്രമിച്ച കേസില്‍ പ്രതിയെന്നു സംശിയിക്കുന്നയാളെ തളിപ്പറമ്പ് പൊലിസ് കസ്റ്റഡിയിലെടുത്തു. ഓട്ടോ ഡ്രൈവറായ കുറ്റ്യേരി സ്വദേശി മഠത്തില്‍ റഷീദി(32)നെയാണ് കസ്റ്റഡിയിലെടുത്തത്. ഇയാള്‍ക്ക് ആടുകളുടെ വില്‍പനയുമുണ്ട്. അറസ്റ്റ് ഇന്ന് രേഖപ്പെടുത്തും. യുവതികളെ കൊലപ്പെടുത്താന്‍ ശ്രമിച്ചതിനുള്ള കാരണം വ്യക്തമായിട്ടില്ല. കഴിഞ്ഞ ദിവസം യുവതികളുടെ മൊഴി രേഖപ്പെടുത്തിയതിനു ശേഷം കുറ്റ്യേരിയിലെ മൂന്നുപേരെ സ്റ്റേഷനില്‍ വിളിച്ചുവരുത്തി ചോദ്യം ചെയ്തിരുന്നു. ഇവര്‍ക്ക് കേസുമായി ബന്ധമില്ലെന്നു കണ്ട് വിട്ടയച്ചു. പിന്നീട് മൊബൈല്‍ ടവര്‍ കേന്ദ്രീകരിച്ച് നടത്തിയ അന്വേഷണത്തില്‍ സംശയം തോന്നിയ യുവാവിനെ അന്വേഷണ ഉദ്യോഗസ്ഥര്‍ കസ്റ്റഡിയിലെടുക്കുകയായിരുന്നു. പരിയാരം മെഡിക്കല്‍ കോളജ് ആശുപത്രിയില്‍ ചികിത്സയിലുള്ള യുവതികള്‍ അപകടനില തരണം ചെയ്തതായി പൊലിസ് അറിയിച്ചു.