ചെറുവത്തൂര്‍ ഉപജില്ലയില്‍
കുട്ടികളുടെ വര്‍ധനചെറുവത്തൂര്‍: പുതിയ അധ്യയന വര്‍ഷത്തില്‍ ചെറുവത്തൂര്‍ ഉപ ജില്ലയിലെ മിക്ക പൊതുവിദ്യാലയങ്ങളിലും കുട്ടികളുടെ എണ്ണം വര്‍ധിച്ചതായി പ്രാഥമിക കണക്കുകള്‍. ഒന്നാം തരത്തിലേക്ക് പ്രവേശനം നേടിയ കുട്ടികളുടെ എണ്ണത്തിലാണ് വര്‍ധനവ് ഉണ്ടായിരിക്കുന്നത്. ജൂണ്‍ എട്ട് ആറാം പ്രവൃത്തിദിനത്തിലെ കണക്കുകള്‍ കൂടി ലഭിച്ചാലേ അന്തിമ കണക്കുകള്‍ വ്യക്തമാകൂ.  
  തുരുത്തി ഗവ: എല്‍.പി സ്‌കൂളില്‍ കഴിഞ്ഞതവണയെത്തിയത് 11 കുട്ടികള്‍. ഇത്തവണ കുട്ടികളുടെ എണ്ണം 30 ആയി ഉയര്‍ന്നു. രണ്ടാംതരത്തിലേക്ക് പത്തുകുട്ടികള്‍ ഇംഗ്ലീഷ് മീഡിയത്തില്‍ നിന്നും എത്തി. കൊടക്കാട് ഗവ: വെല്‍ഫെയര്‍ യു.പി സ്‌കൂളിലേക്ക് ഇത്തവണയും കുട്ടികള്‍ ഒഴുകിയെത്തി. 60 കുട്ടികളാണ് ഇത്തവണ ഒന്നാംതരത്തില്‍ പ്രവേശനം നേടിയത്. കഴിഞ്ഞ വര്‍ഷത്തേക്കാള്‍ രണ്ട് കുട്ടികളുടെ വര്‍ധനവ്. ചന്തേര ഇസ്സത്തുല്‍ ഇസ്ലാം എ എല്‍ പി സ്‌കൂള്‍ ഇത്തവണയും മികവു കാട്ടി 55 കുട്ടികളാണ് ഇവിടെ പഠനത്തിനായി എത്തിയിരിക്കുന്നത്. പാടിക്കീല്‍ ഗവ:യു.പി സ്‌കൂളില്‍ മുപ്പത് കുട്ടികള്‍ ഒന്നാം ക്ലാസിലെത്തി.
 മുന്‍ വര്‍ഷത്തെ അപേക്ഷിച്ച് 22 കുട്ടികളുടെ വര്‍ധനവ്. പിലിക്കോട് ഗവ യു.പി സ്‌കൂളിലും കുട്ടികളുടെ എണ്ണം വര്‍ധിച്ചു. കഴിഞ്ഞ വര്‍ഷം 27 കുട്ടികള്‍ ഒന്നാംതരത്തില്‍ എത്തിയ ഇവിടെ ഇക്കുറി കുട്ടികളുടെ എണ്ണം 39 ആയി ഉയര്‍ന്നു. മയ്യിച്ച ഗവ:എല്‍.പി സ്‌കൂളില്‍ പതിനഞ്ച് കുട്ടികള്‍ എത്തി. കഴിഞ്ഞ തവണ പത്ത് കുട്ടികളായിരുന്നു ഇവിടെ ഒന്നാം ക്ലാസില്‍ എത്തിയത്. ചന്തേര ഗവ:യു പി സ്‌കൂളിലും നാല് കുട്ടികളുടെ വര്‍ധനവ് ഉണ്ടായി. കഴിഞ്ഞ തവണ 15 കുട്ടികള്‍ ഒന്നാം തരത്തില്‍ എത്തിയ ഇവിടെ ഇത്തവണ 19 കുട്ടികള്‍ പ്രവേശനം നേടി.
തൃക്കരിപ്പൂര്‍ സെന്റ് പോള്‍സ് എ.യു.പി സ്‌കൂള്‍ 180, കൈക്കോട്ടു കടവ് പൂക്കോയതങ്ങള്‍ സ്മാരക വൊക്കേഷണല്‍ ഹയര്‍ സെക്കന്‍ഡറി  സ്‌കൂള്‍ 139, ഉദിനൂര്‍ സെന്‍ട്രല്‍ എ.യു.പി.എസ് 84 എന്നിങ്ങനെയാണ് ഒന്നാംതരത്തില്‍ പ്രവേശനം നേടിയ കുട്ടികളുടെ എണ്ണം.
  കുട്ടികളുടെ എണ്ണം കുറഞ്ഞതിനെ തുടര്‍ന്ന്! അനാദായകരമായ സ്‌കൂളുകളുടെ പട്ടികയില്‍ പെട്ടിരുന്ന കൂലേരി ഗവ: എല്‍.പി സ്‌കൂള്‍ 64 കുട്ടികളുമായി ആദായകരമായ സ്‌കൂളുകളുടെ പട്ടികയില്‍ ഇടം പിടിച്ചതും മികച്ച നേട്ടമായി.