കൊച്ചി: തൊണ്ടിമുതലും ദൃക്‌സാക്ഷിയും എന്ന ചിത്രത്തിലെ അഭിനയത്തിന് മികച്ച സഹനടനുള്ള ദേശീയ പുരസ്‌കാരം ലഭിച്ചതില്‍ സന്തോഷമുണ്ടെന്ന് നടന്‍ ഫഹദ് ഫാസില്‍. തനിക്ക് അവാര്‍ഡ് ലഭിക്കുമെന്ന് കരുതിയില്ല. എന്നാല്‍ സിനിമക്ക് അവാര്‍ഡ് ലഭിക്കുമെന്ന പ്രതിക്ഷയുണ്ടായിരുന്നുവെന്നും പുരസ്‌കാര പ്രഖ്യാപനത്തിന് ശേഷം ഫഹദ് മാധ്യമങ്ങളോട് പറഞ്ഞു.

എന്റെ ടേസ്റ്റുള്ള സിനിമകള്‍ ആളുകള്‍ കാണുമോ എന്നായിരുന്നു പേടി. മലയാളത്തിലായതുകൊണ്ടാണ് ഇത്രയും നല്ല സിനിമ ചെയ്യാന്‍ കഴിഞ്ഞത്. തൊണ്ടിമുതലിലേത് വെല്ലുവിളി നിറഞ്ഞവേഷമായിരുന്നു. പലപ്പോഴും സിനിമ പൂര്‍ത്തിയാകുമ്പോഴാണ് എനിക്ക് ചിത്രം പൂര്‍ണമായി മനസിലാകുന്നത്. എന്റെ കാര്യമാണെങ്കില്‍ പൊട്ടക്കണ്ണന്റെ മാവേലേറാണെന്നും ഫഹദ് വ്യക്തമാക്കി.