കൊച്ചി: വിവാദമായ പാറ്റൂര്‍ ഭൂമിക്കേസിലുള്‍പ്പെട്ട 4.356 സെന്റ് സ്ഥലം തിരിച്ചു പിടിക്കണമെന്ന ലോകായുക്തയുടെ ഉത്തരവ് ഹൈക്കോടതി സ്റ്റേ ചെയ്തു.
സ്ഥലം സര്‍ക്കാരിനേറ്റെടുക്കാമെന്ന ലോകായുക്തയുടെ ഏപ്രില്‍ പത്തിലെ ഉത്തരവിനെതിരേ സ്വകാര്യ ബില്‍ഡറായ ആര്‍ടെക് റിയല്‍ട്ടേഴ്‌സ് നല്‍കിയ ഹരജി പരിഗണിച്ചാണ് ചീഫ് ജസ്റ്റിസ് ഉള്‍പ്പെട്ട ഡിവിഷന്‍ ബെഞ്ചിന്റെ ഇടക്കാല ഉത്തരവ്. പാറ്റൂരില്‍ ആര്‍ടെക് റിയല്‍ട്ടേഴ്‌സിന്റെ ഫഌറ്റ് നിര്‍മാണത്തിനായി വാട്ടര്‍ അതോറിറ്റിയുടെ സ്വീവേജ് പൈപ്പ് ലൈന്‍ മാറ്റി നല്‍കിയത് വഴി സര്‍ക്കാരിന് 16.635 സെന്റ് ഭൂമി നഷ്ടമായെന്നാണ് കേസ്. ഇതില്‍ 12.279 സെന്റ് സ്ഥലം നേരത്തെ ലോകായുക്തയുടെ ഉത്തരവു പ്രകാരം ജില്ലാ കലക്ടര്‍ ഏറ്റെടുത്തിരുന്നു.
ബാക്കി 4.356 സെന്റ് കൂടി ഏറ്റെടുക്കാന്‍ ലോകായുക്ത നല്‍കിയ നിര്‍ദേശമാണ് ഹരജിക്കാരന്‍ ഹൈക്കോടതിയില്‍ ചോദ്യം ചെയ്തത്. പാറ്റൂരിലെ ഫഌറ്റിന്റെ പടിഞ്ഞാറ് ഭാഗത്ത് ആമയിഴഞ്ചാന്‍ തോടിനോടു ചേര്‍ന്നുള്ള സ്ഥലമാണ് ഇപ്പോള്‍ ഏറ്റെടുക്കാന്‍ ലോകായുക്ത നിര്‍ദേശിച്ചിട്ടുള്ളത്. ഫഌറ്റിന്റെ ഒരു ഭാഗം ഈ ഭൂമിയിലാണ്.
സ്ഥലമേറ്റെടുക്കുമ്പോള്‍ ഈ ഭാഗം പൊളിക്കേണ്ടി വരുമെന്ന് ചൂണ്ടിക്കാട്ടിയാണ് ആര്‍ടെക് ഹരജി നല്‍കിയത്. പാറ്റൂരിലെ വിവാദ ഭൂമിയില്‍ പൈപ്പ് മാറ്റിയിട്ടതുമായി ബന്ധപ്പെട്ട കേസില്‍ മുന്‍ മുഖ്യമന്ത്രി ഉമ്മന്‍ചാണ്ടി, മുന്‍ ചീഫ് സെക്രട്ടറി ഇ.കെ ഭരത് ഭൂഷണ്‍ തുടങ്ങിയവരെ ഫെബ്രുവരി ഒന്‍പതിന് ഹൈക്കോടതി കുറ്റവിമുക്തരാക്കിയിരുന്നു. സ്ഥലം കൈയേറിയ വിഷയത്തില്‍ ലോകായുക്തക്ക് നടപടി തുടരാമെന്നും വ്യക്തമാക്കിയിരുന്നു. ഇതനുസരിച്ചാണ് സ്ഥലം ഏറ്റെടുക്കാന്‍ ലോകായുക്ത നിര്‍ദേശിച്ചത്.