ഈരാറ്റുപേട്ട: വിഷു അടുത്തിട്ടും ജില്ലയിലെ പകുതിയോളം റേഷന്‍കടകളും കാലി. നല്ലൊരു വിഷുസദ്യ സ്വപ്നം കണ്ടു വരുന്നവര്‍ അധികൃതരെ പ്രാകി വെറും കൈയോടെ മടങ്ങുകയാണ്. വിതരണത്തിന് ആവശ്യമായ ഭക്ഷ്യവസ്തുക്കള്‍ റേഷന്‍കടകളില്‍ എത്തിക്കാത്തതാണ് വിഷുക്കാലത്ത് പാവങ്ങളുടെ വയറ്റത്തടിച്ചത്.
ഭക്ഷ്യഭദ്രതാ നിയമത്തോടെ എഫ്.സി.ഐയില്‍നിന്നു ധാന്യങ്ങള്‍ റേഷന്‍കടകളില്‍ എത്തിക്കാനുള്ള ഉത്തരവാദിത്വം സിവില്‍സപ്ലൈസ് ഉദ്യോഗസ്ഥര്‍ക്കാണ്. എന്നാല്‍ സിവില്‍സപ്ലൈസ് അധികൃതരുടെ അനാസ്ഥമൂലം ജില്ലയില്‍ പകുതിയോളം റേഷന്‍കടകളില്‍ മാത്രമാണ് വിതരണത്തിനാവശ്യമായ ധാന്യങ്ങള്‍ എത്തിച്ചത്. ബാക്കിയുള്ള കടകളിലേക്കുള്ള സാധനങ്ങള്‍ എത്തിച്ചുകൊണ്ടിരിക്കുകയാണെങ്കിലും വിഷുവിന് മുന്‍പ് പൂര്‍ത്തിയാകാനുള്ള സാധ്യത കുറവാണ്.
മാത്രമല്ല, ഒന്നോ രണ്ടോ ദിവസം മുന്‍പ് എത്തിച്ചാല്‍ കൊടുത്തുതീര്‍ക്കാന്‍ വ്യാപാരികളും ബുദ്ധിമുട്ടും. ഭക്ഷ്യഭദ്രതാ നിയമം നടപ്പിലായതിനു ശേഷം എല്ലാ മാസവും തുടക്കത്തില്‍ തന്നെ റേഷന്‍കടകളില്‍ അരിവിതരണം ആരംഭിച്ചിരുന്നു.
വിതരണത്തിനാവശ്യമായ ഭക്ഷ്യധാന്യങ്ങള്‍ തൊട്ടുമുന്‍പത്തെ മാസം മുന്‍കൂറായി എത്തിച്ചുകൊണ്ടാണ് വിതരണം ചെയ്തുകൊണ്ടിരുന്നത്. എന്നാല്‍ കഴിഞ്ഞ മാസം മുന്‍കൂറായി അരി എത്തിച്ചില്ല.
ഇ-പോസ് മെഷീന്‍ വഴിയുള്ള റേഷന്‍വിതരണം ഈ മാസം തുടങ്ങുമെന്ന ധാരണയിലാണ് അധികൃതര്‍ വാതില്‍പടി വൈകിച്ചതെന്ന ആരോപണവുമുണ്ട്. എല്ലാ കടകളിലേക്കും മെഷീന്‍ എത്തിച്ചുകഴിഞ്ഞെങ്കിലും അടുത്ത മാസം മാത്രമേ ഇ-പോസ് വഴിയുള്ള വിതരണം തുടങ്ങുകയുള്ളൂ.
ഭൂരിഭാഗം വ്യാപാരികളും മുന്‍കൂറായി നേരത്തേ തന്നെ പണം അടച്ചിട്ടും വിതരണം വൈകിച്ചതു പ്രതിഷേധത്തിനിടയാക്കിയിട്ടുണ്ട്. റേഷന്‍വിതരണം വൈകിയാല്‍ വിഷുക്കാലത്ത് സ്വകാര്യവിപണിയെ ആശ്രയിക്കേണ്ട ഗതികേടിലാകും പാവങ്ങള്‍.