പുത്തന്‍ചിറ: ഗ്രാമപഞ്ചായത്തിലെ മങ്കിടി കുണ്ടായി റോഡില്‍ ഫെറോന ദേവാലയത്തിനു സമീപമുള്ള പാലത്തോടു ചേര്‍ന്നുള്ള ഭാഗത്ത് സംരക്ഷണ ഭിത്തിയില്ലാത്തതു അപകട ഭീഷണിയാകുന്നു. പുത്തന്‍ചിറ പാടശേഖരത്തിന്റെ നടുവിലൂടെയുളള തോടിന്റെ മുകളിലാണു പാലം നിര്‍മിച്ചിട്ടുള്ളത്.
റോഡിന്റെ ഇരു ഭാഗത്തും സംരക്ഷണ ഭിത്തിയോ സംരക്ഷണ കുറ്റികളോ ഇല്ലാത്തതിനാല്‍ വാഹനങ്ങള്‍ നിയന്ത്രണം വിട്ടാല്‍ താഴ്ച്ചയിലേക്കു വീഴാന്‍ സാധ്യതയുണ്ട്.
റോഡില്‍ നിന്നു മൂന്നു നാലു മീറ്റര്‍ താഴെയാണു തോടും പാടശേഖരങ്ങളുമുള്ളത്. അതിനാല്‍ നിയന്ത്രണം വിട്ടു തോട്ടിലേക്കു വീഴുന്ന വാഹനങ്ങള്‍ വെള്ളത്തില്‍ മുങ്ങിയുള്ള അപകടങ്ങള്‍ക്കും സാധ്യത ഏറെയാണ്.
ബസുകള്‍ ഉള്‍പ്പടെ നിരവധി വാഹനങ്ങള്‍ ദിനേ കടന്നു പോകുന്ന പൊതുമരാമത്ത് റോഡിന്റെ ഇരുഭാഗത്തും സംരക്ഷണ ഭിത്തി നിര്‍മിക്കണമെന്നു ഏറെകാലമായി നാട്ടുകാര്‍ ആവശ്യപ്പെടുന്നുണ്ട്. പാലം കഴിഞ്ഞുള്ള വളവില്‍ ഹോളി ഫാമിലി എല്‍.പി സ്‌കൂളും പ്രവര്‍ത്തിക്കുന്നുണ്ട്.
തൊട്ടടുത്തു തന്നെ സര്‍ക്കാര്‍ യു.പി സൂകൂളുമുണ്ട്. നിരവധി വിദ്യാര്‍ഥികള്‍ സ്‌കൂളിലേക്കു സൈക്കിളിലാണെത്തുന്നത്.
വീതി കുറഞ്ഞ റോഡില്‍ ഈ ഭാഗത്തു വലിയ വാഹനങ്ങള്‍ വന്നാല്‍ സൈക്കിള്‍ ഉള്‍പ്പടെയുള്ള ചെറുവാഹനങ്ങള്‍ ഒതുക്കി നിര്‍ത്താന്‍ സ്ഥലമില്ലാത്തതിനാല്‍ താഴേക്കു വീഴാനും സാധ്യതയുണ്ട്.
പാലത്തിനോടു ചേര്‍ന്നുള്ള ഇരുഭാഗത്തും സംരക്ഷണ ഭിത്തി നിര്‍മിക്കുന്നതിനു അധികൃതരുടെ ഭാഗത്തു നിന്നു അടിയന്തിര നടപടി സ്വീകരിക്കണമെന്നു നാട്ടുകാര്‍ ആവശ്യപ്പെട്ടു .