വടക്കാഞ്ചേരി: നഗരസഭയിലെ 26ാം ഡിവിഷനില്‍ നിന്ന് തെരഞ്ഞെടുക്കപ്പെട്ട ഇടതു മുന്നണി സ്ഥാനാര്‍ഥി നൗഷബ്ബ ജബ്ബാറിന്റെ തെരഞ്ഞെടുപ്പു റദ്ദാക്കണമെന്നു ആവശ്യപ്പെട്ടു എതിര്‍ സ്ഥാനാര്‍ഥി യു.ഡി.എഫിലെ ലൈല അബ്ദുള്‍ അസീസ് സമര്‍പ്പിച്ച ഹര്‍ജി വടക്കാഞ്ചേരി മുന്‍സിഫ് കോടതി തള്ളിയതിനെതിരേ യു.ഡി.എഫ് മേല്‍കോടതിയിലേക്ക്.
കഴിഞ്ഞ തെരഞ്ഞെടുപ്പില്‍ ഒരു വോട്ടിന്റെ ഭൂരിപക്ഷത്തിലായിരുന്നു നൗഷബയുടെ വിജയം. ഇതു കള്ളവോട്ടായിരുന്നുവെന്നാണു ലൈലയുടെ ആരോപണം. മറ്റൊരു ഡിവിഷനില്‍ വോട്ടു ചെയ്ത വ്യക്തി കൈവിരലിലെ മഷി രാസപദാര്‍ത്ഥം ഉപയോഗിച്ചു മായ്ച്ചു കളഞ്ഞുവെന്നും അതിനു ശേഷം 26ാം ഡിവിഷനിലെത്തി നൗഷബക്കു വോട്ടു ചെയ്തുവെന്നും ഹര്‍ജിയില്‍ ആരോപിച്ചിരുന്നു.
ഇതു പരിശോധിക്കാന്‍ നേരത്തെ കോടതി തെരഞ്ഞെടുപ്പു കമ്മീഷന്റെ സഹായത്തോടെ വോട്ടിങ് മെഷീന്‍ വീണ്ടും തുറന്നെണ്ണുകയും ചെയ്തിരുന്നു. ഇതു രാഷ്ട്രീയ വൃത്തങ്ങളില്‍ വലിയ ചര്‍ച്ചക്കു വഴിവെക്കുകയും ചെയ്തിരുന്നതാണ്.
തെളിവുകളും രേഖകളും വിശദമായി പരിശോധിച്ച കോടതി ലൈല അബ്ദുല്‍അസീസിന്റെ ആരോപണങ്ങളില്‍ കഴമ്പില്ലെന്നു കണ്ടെത്തുകയായിരുന്നു.
2015 നവംബര്‍ അഞ്ചിനു നടന്ന തെരഞ്ഞെടുപ്പില്‍ ആകെ പോള്‍ ചെയ്ത 1,075 വോട്ടില്‍ നൗഷബക്കു രണ്ടു പോസ്റ്റല്‍ വോട്ടു ഉള്‍പ്പെടെ 488 ഉം ലൈല അബ്ദുള്‍ അസീസിനു 487 വോട്ടുമാണു ലഭിച്ചത്. 1,074 വോട്ടില്‍ ഒന്നു മെഷീനില്‍ തെളിഞ്ഞിരുന്നില്ല. ഇതും വിവാദത്തിനു വഴിവച്ചിരുന്നു.
നൗഷബ്ബയുടെ വിജയം കോടതി ശരിവച്ചതോടെ വലിയ ആഹ്ലാദത്തിലാണു ഇടതു മുന്നണി പ്രവര്‍ത്തകര്‍. നൗഷബക്കു വേണ്ടി അഭിഭാഷകരായ കെ.പി മുരളീധരന്‍, ജോസ് പീറ്റര്‍ ഹാജരായി. 41 അംഗ നഗരസഭയില്‍ എല്‍.ഡി.എഫ് 25, യു.ഡി.എഫ് 15 , ബി.ജെ.പി ഒന്ന് എന്നിങ്ങനെയാണു നിലവിലെ കക്ഷി നില.
അതിനിടെ മുന്‍സിഫ് കോടതി വിധിക്കെതിരേ മേല്‍കോടതിയെ സമീപിക്കുമെന്നു യു.ഡി.എഫ് വൃത്തങ്ങള്‍ അറിയിച്ചു. വിധിയുടെ പകര്‍പ്പു ലഭിച്ചാലുടന്‍ ഹരജിയുമായി മുന്നോട്ടു പോകുമെന്നു ഡി.സി.സി ജനറല്‍ സെക്രട്ടറിയും നഗരസഭ പ്രതിപക്ഷ നേതാവുമായ കെ. അജിത്കുമാര്‍ അറിയിച്ചു.