കൂത്തുപറമ്പ്: നാടിന്റെ പശ്ചാത്തല വികസനം ലക്ഷ്യമിട്ട് സര്‍ക്കാര്‍ മുന്നോട്ടുപോകുമെന്നും എതിര്‍പ്പ് ഉയരുന്നുവെന്ന കാരണത്താല്‍ മാത്രം പദ്ധതികള്‍ ഉപേക്ഷിക്കില്ലെന്നും മുഖ്യമന്ത്രി പിണറായി വിജയന്‍. നാടിന്റെ പൊതുവായ വികസനകാര്യത്തിനു ഭൂമി ഏറ്റെടുക്കുന്നതിനു തടസം നില്‍ക്കുന്ന പ്രവണത ശരിയല്ലെന്നും അദ്ദേഹം പറഞ്ഞു. പുതുതായി നിര്‍മിക്കുന്ന മമ്പറം പാലത്തിന്റെ പ്രവൃത്തി ഉദ്ഘാടനം ചെയ്യുകയായിരുന്നു മുഖ്യമന്ത്രി. പശ്ചാത്തല വികസനം നല്ലരീതിയില്‍ തന്നെ നടപ്പാക്കുകയും സമയബന്ധിതമായി അവ പൂര്‍ത്തിയാക്കേണ്ടതുമുണ്ട്. ചില ഭാഗങ്ങളില്‍ നിന്ന് ഇതിനെതിരേ എതിര്‍പ്പ് ഉയര്‍ന്നാല്‍ എല്ലാവരും ഇതിനെതിരാണെന്നാണു പ്രത്യക്ഷത്തില്‍ തോന്നുക. അങ്ങിനെ വിചാരിക്കേണ്ടതില്ല. എതിര്‍പ്പ് ഉയരുന്നുവെന്ന കാരണത്താല്‍ മാത്രം പദ്ധതികള്‍ ഉപേക്ഷിക്കാന്‍ സര്‍ക്കാര്‍ തയാറല്ല. പദ്ധതികള്‍ക്കായി ഭൂമി നഷ്ടപ്പെടുന്നവര്‍ക്കു ന്യായമായ നഷ്ടപരിഹാരവും പുനരധിവാസവും സര്‍ക്കാര്‍ ഏര്‍പ്പെടുത്തും. ഇത്തരം കാര്യങ്ങള്‍ക്കു തടസം നില്‍ക്കാതെ സഹകരിക്കുകയാണു വേണ്ടതെന്നും നാടിന്റെ ഭാവി കണ്ടുകൊണ്ടുള്ള നിലപാടാണു സര്‍ക്കാര്‍ സ്വീകരിക്കുക. ഏറ്റവും കൂടുതല്‍ പണം നല്‍കി ഭൂമി ഏറ്റെടുക്കുന്നതു കേരളത്തില്‍ ചെലവ് കൂടിയതിനാല്‍ എലിവേറ്റഡ് ഹൈവേ കേന്ദ്രം അംഗീകരിക്കുന്നില്ലെന്നും മുഖ്യമന്ത്രി പറഞ്ഞു.