ഇരിട്ടി: കര്‍ണാടകയില്‍നിന്നു ചരക്കുമായി കണ്ണൂരിലേക്ക് പോവുകയായിരുന്ന ലോറി നിയന്ത്രണം വിട്ട് വീടിനു മുകളിലേക്ക് മറിഞ്ഞു. ഡ്രൈവര്‍ അത്ഭുതകരമായി രക്ഷപ്പെട്ടു. പടിയൂര്‍ പൂവത്തിനടുത്ത് ഇന്നലെ പുലര്‍ച്ചെ രണ്ടോടെയാണ് ചിറമ്മല്‍ കുഞ്ഞിരാമന്റെ വീടിനു മുകളിലേക്ക് ലോറി മറിഞ്ഞത്. ഡ്രൈവര്‍ ഉറങ്ങിപ്പോയതാണ് കാരണമെന്നു പറയുന്നു. തലനാരിഴയ്ക്കാണ് വന്‍ അപകടം ഒഴിവായത്. വീടിനു മുകളില്‍ ലോറിയുടെ മുന്‍ഭാഗം പതിച്ചെങ്കിലും പൂര്‍ണമായും മറിയുംമുമ്പ് മണ്ണില്‍പൂണ്ട് ലോറി ഒരു വശം ചെരിഞ്ഞു നിന്നതിനാലാണ് അപകടം ഒഴിവായത്. സംഭവ സമയം വീടിനുള്ളിലുള്ളവര്‍ ഉറക്കത്തിലായിരുന്നു. നാട്ടുകാരും ഇരിക്കൂര്‍ പൊലിസും അഗ്‌നിശമന സേനാംഗങ്ങളും ഏറെ പണിപ്പെട്ടാണ് അപകടത്തില്‍പ്പെട്ട ചരക്കുലോറി മാറ്റിയത്.