കുറ്റ്യാടി: സര്‍ക്കാര്‍ ഡോക്ടര്‍മാരുടെ അനിശ്ചിതകാല സമരം കുറ്റ്യാടി ഗവ. താലൂക്ക് ആശുപത്രിയില്‍ ചികിത്സ തേടിയെത്തിയ രോഗികളെ വലച്ചു. നിത്യേന 600ല്‍പരം രോഗികളെത്തുന്ന ഒ.പി പൂര്‍ണമായും അടഞ്ഞുകിടന്നു. സ്ഥിര ഡോക്ടര്‍മാര്‍ ആരും തന്നെ ഒ.പിയില്‍ ഡ്യൂട്ടിക്കെത്തിയില്ല. സമരം അര്‍ധരാത്രി പ്രഖ്യാപിച്ചതിനാല്‍ വിവരമറിയാതെ എത്തിയ എന്‍.ആര്‍.എച്ച്.എമ്മിലെ മൂന്ന് ഡോക്ടര്‍മാര്‍ അത്യാഹിത വിഭാഗത്തില്‍ വച്ച് പരിശോധന നടത്തിയത് ആശ്വാസമായി. ഇതിനിടെ ഒ.പി ടിക്കറ്റ് വിതരണം മറ്റൊരു സ്ഥലത്തേക്ക് മാറ്റിയതില്‍ രോഗികള്‍ പ്രയാസപ്പെട്ടു. ഒ.പിയില്‍ നിന്നുള്ള പരിശോധന ഇല്ലാത്തതിനാല്‍ ടിക്കറ്റ് കൗണ്ടര്‍ ആശുപത്രിക്കുള്ളില്‍ നിന്നാണ് വിതരണം ചെയ്തത്.
കുന്നുമ്മല്‍ ബ്ലോക്ക് പരിധിയിലെ ഏഴു പഞ്ചായത്തുകളിലെ ആയിരക്കണക്കിനാളുടെ ഏക ആശ്രയമാണ് താലൂക്ക് ആശുപത്രി. സമരം വരുംദിനങ്ങളില്‍കൂടി ഉണ്ടാകുമെന്നതിനാല്‍ ആശുപത്രിയുടെ പ്രവര്‍ത്തനം താളംതെറ്റുന്നത് രോഗികള്‍ക്ക് കനത്ത ആഘാതമായിരിക്കും.
ഈ സാഹചര്യത്തില്‍ ഡോക്ടര്‍മാരുടെ സേവനം ഉറപ്പുവരുത്താനാവശ്യമായ അടിയന്തര നടപടികള്‍ വേണമെന്നാണ് ജനങ്ങളുടെ ആവശ്യം.