മാവൂര്‍: ചെറുപ്പ എം.സി.എച്ച് യൂനിറ്റിലെ ബ്ലോക്ക് തല സൂപ്പര്‍വൈസറും പൊതുജനാരോഗ്യ പ്രവര്‍ത്തകരുടെ കോഡിനേറ്ററുമായ പി.പി മുരളീധരന്‍ മാവൂര്‍ പഞ്ചായത്ത് ഹെല്‍ത്ത് ഇന്‍സ്‌പെക്ടര്‍ പി. ഉണ്ണികൃഷ്ണന്‍ എന്നിവര്‍ക്കെതിരേ പഞ്ചായത്ത് അംഗങ്ങള്‍ ഉന്നയിച്ചത് അടിസ്ഥാനരഹിതമായ ആരോപണങ്ങളാണെന്ന് ആശുപത്രിയില്‍ ചേര്‍ന്ന സ്റ്റാഫ് കൗണ്‍സില്‍ അഭിപ്രായപ്പെട്ടു.
ആശുപത്രിയിലെ സര്‍ക്കാര്‍ നിര്‍ദിഷ്ട പ്രവര്‍ത്തനം തടസപ്പെടുത്തുന്ന വിധം തെരഞ്ഞെടുക്കപ്പെട്ട പ്രാദേശിക ഭരണകര്‍ത്താക്കള്‍ തന്നെ അക്രമത്തിന് നേതൃത്വം നല്‍കിക്കൊണ്ട് ആരോഗ്യവകുപ്പിനെ അപമാനിക്കുകയും ആശുപത്രി ജീവനക്കാരായ ചെയ്തു ബഷീറിനെ മുറിയിലിട്ട് പൂട്ടുകയും ചെയ്തതായി കൗണ്‍സില്‍ ആരോപിച്ചു. ആശുപത്രി സൂപ്രവൈസറെ അപായപ്പെടുത്തുമെന്ന് ഭീഷണിപ്പെടുത്തിയെന്നാരോപിച്ച് ഇന്നലെ മെഡിക്കല്‍ കോളജ് പരിസരത്ത് ചേര്‍ന്ന പ്രത്യേക സ്റ്റാഫ് കൗണ്‍സില്‍ യോഗം പ്രതിഷേധിച്ചു. കൃത്യനിര്‍വഹണം തടയലും ഭീഷണിപ്പെടുത്തലും സംബന്ധിച്ച് പൊലിസില്‍ നല്‍കിയ പരാതിയില്‍ കുറ്റക്കാര്‍ക്കെതിരേ ആശുപത്രിയില്‍ സംരക്ഷണനിയമപ്രകാരം ജാമ്യമില്ലാ കുറ്റം ചുമത്തി പ്രതികളെ അറസ്റ്റ് ചെയ്യണമെന്നും ഓഫിസിലും പുറത്തുമായി ജോലിസ്ഥലങ്ങളില്‍ സുരക്ഷ ഉറപ്പാക്കണമെന്നും ഭയ രഹിതമായി ജോലിചെയ്യാന്‍ സൗകര്യമൊരുക്കണമെന്നും ജീവനക്കാര്‍ ആവശ്യപ്പെട്ടു.