ചേലേമ്പ്ര: ദേശീയപാത വികസനത്തിന്റെ ഭാഗമായി ചേലേമ്പ്രയില്‍ നടന്ന അലൈന്‍മെന്റിലെ അട്ടിമറി ആരോപണവുമായി ബന്ധപ്പെട്ട വിവാദത്തില്‍ ജനങ്ങളെ രണ്ടു ചേരിയിലാക്കാന്‍ സി.പി.എം ശ്രമിക്കുന്നതായി ആരോപണം.
ജനവാസം കൂടിയ പ്രദേശത്തിലൂടെ ആരാധനാലയങ്ങളും ടൗണിലെ നിരവധി വ്യാപാര കേന്ദ്രങ്ങളും ഇല്ലാതാക്കുന്ന റീ അലൈന്‍മെന്റില്‍ സര്‍വേ നടത്തുന്നതിനെതിരേ ഇരകളുടെ പ്രതിഷേധ സമരം ശക്തമാകുകയും ആത്മഹത്യാ ഭീഷണിയടക്കം ഉയരുകയും ചെയ്തതോടെ പ്രശ്‌നം പരിഹരിക്കുന്നതിനായി സര്‍വകക്ഷി യോഗം വിളിച്ചുചേര്‍ത്തിരുന്നു. പുതിയ അലൈന്‍മെന്റില്‍ സര്‍വേ നടത്തുന്നതോടൊപ്പം പഴയ അലൈന്‍മെന്റിലും സര്‍വേ നടത്തി ചെലവ് കുറഞ്ഞതും ജനങ്ങള്‍ക്ക് ഏറെ നഷ്ടം സംഭവിക്കാത്തതുമായ അലൈന്‍മെന്റില്‍ ദേശീയപാത നിര്‍മിക്കാമെന്നാണ് സര്‍വകക്ഷി യോഗത്തില്‍ മന്ത്രി അറിയിച്ചത്.
കൂടുതല്‍ വീടുകളും കെട്ടിടങ്ങളും നഷ്ടപ്പടാത്ത രീതിയിലുള്ള അലൈന്‍മെന്റില്‍ സര്‍വേ നടത്തണമെന്നും ഇക്കാര്യത്തില്‍ ജനങ്ങള്‍ക്കൊപ്പം നില്‍ക്കുമെന്നും ഇരകളെയും ജനപ്രതിനിധികളെയും പങ്കെടുപ്പിച്ച് ഇന്നലെ ഒരു സ്വകാര്യ ചാനല്‍ നടത്തിയ ചര്‍ച്ചയില്‍ സി.പി.എം നേതാക്കളും പറഞ്ഞു. എന്നാല്‍, പഴയ അലൈന്‍മെന്റില്‍ സര്‍വേ നടത്താനുള്ള തീരുമാനം പ്രഹസനമാണെന്നാരോപിച്ച് ആ പ്രദേശത്തെ ജനങ്ങളെ സംഘടിപ്പിച്ച് ഇരകള്‍ക്കെതിരേ നീക്കം നടത്തുകയാണ് സി.പി.എം നേതൃത്വം ഇപ്പോള്‍ ചെയ്യുന്നതെന്നാണ് ഗ്രാമപഞ്ചായത്തിനു മുന്നില്‍ കുടില്‍ കെട്ടി സമരം നടത്തുന്ന ഇരകളുടെ ആരോപണം.
സ്വകാര്യ ചാനല്‍ നടത്തിയ ചര്‍ച്ചയ്ക്കു ശേഷം ഇരു പ്രദേശങ്ങളിലെയും ജനങ്ങള്‍ തമ്മില്‍ ഇതുമായി ബന്ധപ്പെട്ടു വാക്കേറ്റവുമുണ്ടായി. നീതിക്കുവേണ്ടി പോരാടുന്ന ഇരകളുടെ സമരത്തിനു പിന്തുണ നല്‍കാന്‍ പോലും എത്താത്ത സി.പി.എം നേതൃത്വം ജനങ്ങള്‍ക്കൊപ്പം നില്‍ക്കുമെന്നു ചാനലിനു മുന്നില്‍ പറയുന്നതു പരിഹാസ്യമാണെന്നും ഇരകള്‍ പറഞ്ഞു.