പഴയങ്ങാടി: അറവുമാലിന്യം തള്ളി പഴയങ്ങാടി പുഴ മലീമസപ്പെടുന്നു. പ്രദേശത്തെ ചിക്കന്‍ സ്റ്റാളുകളിലെ മാലിന്യങ്ങള്‍ അടക്കം പുഴയില്‍ തന്നെയാണ് തള്ളുന്നതും. സമീപ പ്രദേശങ്ങളിലുള്ളവരും ഇരുട്ടിന്റെ മറവില്‍ പുഴയില്‍ മാലിന്യം തള്ളുന്നുണ്ട്. വാഹനങ്ങളിലും മറ്റും എത്തി പഴയങ്ങാടി റെയില്‍വേ പാലത്തിന് മുകളില്‍ നിന്നാണ് മാലിന്യം തള്ളുന്നത്. പുഴ, തോട് എന്നിവിടങ്ങളില്‍ മാലിന്യം തള്ളുന്നതിനെതിരേ മാടായി പഞ്ചായത്ത് അധികൃതര്‍ ശക്തമായ നിലപാട് സ്വീകരിച്ചതിന്റെ ഭാഗമായി കഴിഞ്ഞവര്‍ഷം ഈ മേഖലയില്‍ ജോലി ചെയ്യുന്നവരുടെ യോഗം വിളിക്കുകയും മാലിന്യങ്ങള്‍ പഴയങ്ങാടി പുഴയിലും സുല്‍ത്താന്‍ കനാലിലും തള്ളരുതെന്ന് മുന്നറിയിപ്പ് നല്‍കുകയും ചെയ്തിരുന്നു. ഇതിന്റെ അടിസ്ഥാനത്തില്‍ കുറച്ചുകാലം മാലിന്യം തള്ളുന്നതിന് കുറവു വന്നെങ്കിലും പിന്നിട് എല്ലാം പഴയപടി തന്നെ ആവുകയായിരുന്നു.