കാസര്‍കോട്: സംസ്ഥാന വ്യാപകമായി സര്‍ക്കാര്‍ ഡോക്ടര്‍മാര്‍ നടത്തുന്ന പണിമുടക്ക് രണ്ടാം ദിവസത്തിലേക്കു കടന്നതോടെ ജില്ലയില്‍ സര്‍ക്കാര്‍ ആശുപത്രികളെ ആശ്രയിക്കുന്ന പാവപ്പെട്ട രോഗികളുടെ ദുരിതം ഇരട്ടിയായി. ജില്ലയിലെ സര്‍ക്കാര്‍ ആശുപത്രികളിലും ഡിസ്‌പെന്‍സറികളിലും ഡോക്ടര്‍മാര്‍ എത്താത്തതിനെ തുടര്‍ന്നു ചികിത്സ തേടിയെത്തിയവര്‍ മടങ്ങിപ്പോയി.
ഇന്നലെ രാവിലെ കാസര്‍കോട് ജനറല്‍ ആശുപത്രിയില്‍ നൂറുകണക്കിനാളുകളാണ് ചികിത്സ തേടിയെത്തിയത്. എന്നാല്‍ ഒ.പി വിഭാഗത്തിലെ വിദഗ്ധ ഡോക്ടര്‍മാര്‍ പണിമുടക്കിലാണെന്നറിഞ്ഞു നിരവധി രോഗികള്‍ തിരിച്ചു പോയി. അത്യാഹിത വിഭാഗവും കാഷ്വാലിറ്റിയും മാത്രമാണ് ഇന്നലെ ജില്ലയിലെ ആശുപത്രികളില്‍ പ്രവര്‍ത്തിച്ചത്.
കേരള ഗവ.മെഡിക്കല്‍ ഓഫിസേഴ്‌സ് അസോസിയേഷന്റെ നേതൃത്വത്തിലാണ് ഡോക്ടര്‍മാര്‍ സമരം നടത്തുന്നത്. സമരം നീണ്ടു പോയാല്‍ അത്യാഹിത വിഭാഗങ്ങളെയും ശസ്ത്രക്രിയാ വിഭാഗങ്ങളെയും ബാധിച്ചേക്കും. ഡോക്ടര്‍മാരുടെ സമരം അറിയാതെ എത്തിയ രോഗികളും കൂടെയുള്ളവരും വല്ലാതെ വലഞ്ഞു. പലരും ഡോക്ടര്‍മാര്‍ എത്തി പരിശോധിക്കുമെന്നു കരുതി മണിക്കൂറുകള്‍ കാത്തിരുന്നശേഷമാണു തിരിച്ചു പോയത്.