കൊച്ചി: ശ്രീജിത്തിന് മര്‍ദനമേറ്റത് വരാപ്പുഴ പൊലിസ് ലോക്കപ്പില്‍ വച്ചുതന്നെയെന്ന് വ്യക്തമാക്കുന്ന തെളിവായി സ്റ്റേഷനില്‍ വച്ചെടുത്ത ശ്രീജിത്തിന്റെ ഫോട്ടോ പുറത്ത്. വീട്ടില്‍ നിന്ന് കസ്റ്റഡിയിലെടുത്ത ശ്രീജിത്തിനെ സ്റ്റേഷനില്‍ എത്തിച്ച ശേഷം രാത്രി 11 ഓടെ മൊബൈലില്‍ പകര്‍ത്തിയ ഫോട്ടോയാണ് പുറത്തുവന്നിരിക്കുന്നത്. മരണകാരണം കണ്ടെത്താനുള്ള കടുത്ത ശ്രമത്തിലാണ് അന്വേഷണ ഉദ്യോഗസ്ഥര്‍. വീട്ടില്‍ നിന്ന് ശ്രീജിത്തിനെ കസ്റ്റഡിയിലെടുത്ത ആര്‍.ടി.എഫ് സ്‌ക്വാഡ് അംഗങ്ങളാണോ അതോ സ്‌റ്റേഷനില്‍ ലോക്കപ്പില്‍ വച്ച് ഡ്യൂട്ടിയിലുണ്ടായിരുന്ന പൊലിസ് ഉദ്യോഗസ്ഥരാണോ മര്‍ദിച്ചതെന്നത് ഇപ്പോഴും വ്യക്തമല്ല. ഈ സാഹചര്യത്തില്‍ സ്‌റ്റേഷനിലെ പൊലിസുകാരന്‍ മൊബൈല്‍ ഫോണില്‍ എടുത്ത ഫോട്ടോ നിര്‍ണായക തെളിവായിമാറും. അന്വേഷണസംഘം ഇന്ന് കൂടുതല്‍ പേരെ ചോദ്യം ചെയ്യും.