ന്യൂഡല്‍ഹി: കായല്‍ കൈയേറ്റ കേസില്‍ ഹൈക്കോടതി ഉത്തരവിനെതിരേ മുന്‍ മന്ത്രി തോമസ് ചാണ്ടി സുപ്രിംകോടതിയില്‍ നല്‍കിയ ഹരജി പിന്‍വലിച്ചു.
ഹൈക്കോടതിയുടെ ഉത്തരവും ജില്ലാ കലക്ടറുടെ റിപ്പോര്‍ട്ടിനെ തുടര്‍ന്നുള്ള തുടര്‍നടപടികളും സ്റ്റേ ചെയ്യണമെന്ന് ആവശ്യപ്പെട്ട് നല്‍കിയ ഹരജിയാണ് തോമസ് ചാണ്ടി ഇന്നലെ പിന്‍വലിച്ചത്. തോമസ് ചാണ്ടി ഇപ്പോള്‍ മന്ത്രി അല്ലാത്തതിനാല്‍ ഹൈക്കോടതി അദ്ദേഹത്തിന്റെ ഹരജിയുടെ മെറിറ്റില്‍ വാദം കേള്‍ക്കണമെന്നും സുപ്രിംകോടതി വ്യക്തമാക്കി.
കേസ് നല്‍കുമ്പോള്‍ തോമസ് ചാണ്ടി മന്ത്രിയാണ്. എന്നാല്‍ ഇപ്പോള്‍ മന്ത്രിസ്ഥാനമില്ല. അതിനാല്‍ കേസുമായി മുന്നോട്ടു പോകാന്‍ താല്‍പര്യമില്ലെന്നാണ് തോമസ് ചാണ്ടിയുടെ അഭിഭാഷകന്‍ കോടതിയെ അറിയിച്ചത്. മന്ത്രിയല്ലാത്തതിനാല്‍ സുപ്രിംകോടതിയിലെ കേസ് പിന്‍വലിച്ച് ഹൈക്കോടതിയിലെ കേസുമായി മുന്നോട്ടു പോകാന്‍ അനുവദിക്കണമെന്നും അദ്ദേഹത്തിന്റെ അഭിഭാഷകന്‍ ആവശ്യപ്പെടുകയായിരുന്നു.