ദമസ്‌കസ്: സിറിയയിലെ ദൂമയില്‍ രാസായുധ ആക്രമണം നടന്ന പ്രദേശത്ത് പരിശോധന സംഘത്തെ പ്രവേശിപ്പിക്കാന്‍ സര്‍ക്കാര്‍ ഇതുവരെ തയാറായിട്ടില്ലെന്ന് യു. കെ അധികൃതര്‍. രാസായുധ നിരോധന സംഘടനയായ ഒ.പി.സി.ഡബ്ല്യു പ്രതിനിധികളെയാണ് ആക്രമണം നടന്ന സ്ഥലത്തേക്ക് പ്രവേശിക്കാന്‍ അനുവദിക്കാത്തത്. പരിശോധനയുമായി റഷ്യയും സിറിയയും സഹകരിക്കണമെന്നും പരിശോധന സംഘത്തിന് പ്രവേശനം നല്‍കണമെന്നും യു.കെ അധികൃതര്‍ പറഞ്ഞു.
എന്നാല്‍ റഷ്യ ഇക്കാര്യം നിഷേധിച്ചു. രാസായുധ നിരോധന സംഘടനകളുമായി കൂടിക്കാഴ്ച നടത്തിയെന്നും വ്യോമാക്രമണം നടത്തിയതിനാലാണ് അവര്‍ക്ക് പ്രവേശനം വൈകിയതെന്നും റഷ്യന്‍ വിദേശകാര്യ സഹമന്ത്രി സെര്‍ജി റെയ്ബ്‌കോവ് പറഞ്ഞു.
സംഘടനക്ക് പ്രവേശനത്തിന് തടസങ്ങളൊന്നുമില്ലെന്ന് ഒ.പി.സി.ഡബ്ല്യു റഷ്യന്‍ പ്രതിനിധി പറഞ്ഞു. അന്വേഷണ സംഘത്തിന്റെ ആത്മവിശ്വാസം ഇല്ലാതാക്കാനാണ് യു.എസിന്റെ നേതൃത്വത്തില്‍ ശ്രമംനടക്കുന്നതെന്നും അദ്ദേഹം പറഞ്ഞു.