എടച്ചേരി: അടുത്ത അധ്യയന വര്‍ഷത്തേക്കുള്ള അധ്യാപകരുടെ അവധിക്കാല പരിശീലന പരിപാടിക്ക് ഇന്ന് തുടക്കമാകും. കഴിഞ്ഞ വര്‍ഷം ഒന്ന്, രണ്ട് ക്ലാസുകളിലെ അധ്യാപകര്‍ക്ക് മാത്രമായി നല്‍കിയ പരിശീലനം ഈ പ്രാവശ്യം മുഴുവന്‍ ക്ലാസുകളിലെ ഇംഗ്ലീഷ് അധ്യാപകര്‍ക്കും നല്‍കാനാണ് തീരുമാനം.
കഴിഞ്ഞ അവധിക്കാല പരിശീലനത്തിന് ശേഷം സ്‌കൂള്‍ തുറന്ന് കഴിഞ്ഞാണ് ഒന്ന്, രണ്ട് ക്ലാസ്സുകളിലെ അധ്യാപകര്‍ക്ക് മാത്രമായി ഇംഗ്ലീഷ് ഭാഷയ്ക്ക് മാത്രം പ്രാമുഖ്യം നല്‍കിയുള്ള 'ഹലോ ഇംഗ്ലീഷ് 'പരിപാടി സംഘടിപ്പിച്ചത്.
ഹലോ ഇംഗ്ലീഷ് പരിശീലന പരിപാടി ചുരുക്കം അധ്യാപകരില്‍ മാത്രമായി പരിമിതിപ്പെടുത്തിയത് പരാതി ഉയര്‍ന്നിരുന്നു. ഈ സാഹചര്യത്തിലാണ് പ്രൈമറി തലത്തില്‍ ഇംഗ്ലീഷ് പഠനം മെച്ചപ്പെടുത്തുന്നതിന്റെ ഭാഗമായി എല്ലാ അധ്യാപകര്‍ക്കും ഹലോ ഇംഗ്ലീഷ് പരിശീലനം നല്‍കുന്നത്.
ഈ മാസം 23മുതല്‍ ആരംഭിക്കുന്ന ബി.ആര്‍.സി തല അധ്യാപക പരിശീലനത്തില്‍ ആറുദിവസം ഇംഗ്ലീഷ് പരിശീലനത്തിന് മാത്രമായിട്ടാണ് നീക്കിവച്ചിരിക്കുന്നത്. സംസ്ഥാന തലത്തില്‍ ഈ പരിപാടിക്കായി പരിശീലനം നേടിയ അധ്യാപകരുടെ എണ്ണക്കുറവ് കാരണം കഴിഞ്ഞ വര്‍ഷം ഈ പ്രോഗ്രാം തുടര്‍ന്ന് നടത്തിയുമില്ല.
ഹലോ ഇംഗ്ലീഷ് പ്രോഗ്രാമില്‍ പങ്കെടുക്കുന്ന അധ്യാപകര്‍ക്ക് മറ്റ് വിഷയങ്ങളുടെ കോഴ്‌സില്‍ പങ്കെടുക്കേണ്ടതില്ലെന്നാണ് ഉത്തരവ്.