കൊല്‍ക്കത്ത: സ്വന്തം തട്ടകത്തില്‍ ഡല്‍ഹി ഡയര്‍ഡെവിള്‍സിനെ 71 റണ്‍സിന് തുരത്തി കൊല്‍ക്കത്ത നൈറ്റ് റൈഡേഴ്‌സ്. ആദ്യം ബാറ്റ് ചെയ്ത കൊല്‍ക്കത്ത നിശ്ചിത 20 ഓവറില്‍ 200 റണ്‍സെന്ന മികച്ച സ്‌കോര്‍ പടുത്തുയര്‍ത്തി.
കൂറ്റന്‍ ലക്ഷ്യത്തിലേക്ക് ബാറ്റേന്തിയ ഡല്‍ഹിയുടെ ബാറ്റിങ് നിര ചീട്ടുകൊട്ടാരം പോലെ തകര്‍ന്നുപോയി. 14.2 ഓവറില്‍ 129 റണ്‍സില്‍ അവര്‍ കൂടാരം കയറി. 22 പന്തില്‍ 47 അടിച്ച് ഗ്ലെന്‍ മാക്‌സ്‌വെലും 26 പന്തില്‍ 43 റണ്‍സെടുത്ത് റിഷഭ് പന്തും പ്രതീക്ഷ നല്‍കിയെങ്കിലും ഇരുവരും പുറത്തായതോടെ കൊല്‍ക്കത്തയ്ക്ക് ചടങ്ങ് തീര്‍ക്കേണ്ട ബാധ്യത മാത്രമേ ഉണ്ടായിരുന്നുള്ളു. മറ്റൊരു ബാറ്റ്‌സ്മാനും രണ്ടക്കം പോലും കടന്നില്ല. മൂന്ന് വീതം വിക്കറ്റുകളെടുത്ത സുനില്‍ നരെയ്ന്‍, കുല്‍ദീപ് യാദവ് എന്നിവരുടെ മാരക ബൗളിങാണ് കൊല്‍ക്കത്തയുടെ വിജയം എളുപ്പമാക്കിയത്.
നേരത്തെ ടോസ് നേടി ഡല്‍ഹി കൊല്‍ക്കത്തയെ ബാറ്റിങിനയക്കുകയായിരുന്നു. തുടക്കത്തില്‍ പതിഞ്ഞ നിലയില്‍ സഞ്ചരിച്ച കൊല്‍ക്കത്തയുടെ സ്‌കോര്‍ അവസാന ഘട്ടത്തില്‍ ടോപ് ഗിയറിലാകുകയായിരുന്നു. 12 പന്തില്‍ ആറ് സിക്‌സറുകള്‍ പറത്തി 41 റണ്‍സ് വാരി റസ്സലിന്റെ മിന്നല്‍ ബാറ്റിങ് കൊല്‍ക്കത്തയ്ക്ക് ആവേശമായി. നിധീഷ് റാണ (35 പന്തില്‍ 59), റോബിന്‍ ഉത്തപ്പ (19 പന്തില്‍ 35) എന്നിവരും കൊല്‍ക്കത്തയ്ക്കായി തിളങ്ങി. ഡല്‍ഹിക്കായി തേവാതിയ മൂന്ന് വിക്കറ്റുകള്‍ വീഴ്ത്തി.