കൊച്ചി: വരാപ്പുഴ കസ്റ്റഡി മരണത്തെക്കുറിച്ച് സുതാര്യവും സമഗ്രവുമായ അന്വേഷണം നടത്തണമെന്നും ശ്രീജിത്തിന്റെ കുടുംബത്തിന് നഷ്ടപരിഹാരവും ഭാര്യക്ക് തൊഴിലും നല്‍കണമെന്നും സി.പി.ഐ ജില്ലാസെക്രട്ടറി പി. രാജു ആവശ്യപ്പെട്ടു. വരാപ്പുഴ ദേവസ്വംപാടത്തുണ്ടായ സംഭവവികാസങ്ങളുടെ തുടര്‍ച്ചയായി വാസുദേവന്‍ ആത്മഹത്യ ചെയ്ത സംഭവത്തില്‍ കുറ്റാരോപിതരായ പ്രതികളെ പിടികൂടിയതിലുള്ള തിടുക്കവും പൊലിസിനെതിരായി ഉയര്‍ന്നിട്ടുള്ള ആരോപണങ്ങളെക്കുറിച്ചും നീതിപൂര്‍വവും നിഷ്പക്ഷവുമായ അന്വേഷണം ആവശ്യമാണ്.
വരാപ്പുഴ പൊലിസ് സ്റ്റേഷന്‍ ഗുണ്ടാ മാഫിയ ബന്ധമുള്ളമുള്ള പൊലിസുകാരുടെ താവളമാണ്. ഈ സ്റ്റേഷന്‍ ആരംഭിച്ച സമയത്താണ് ബപ്പി എന്ന മധ്യവയ്‌സ്‌കനെ ലോക്കപ്പില്‍ ഇട്ടു മര്‍ദിച്ചു കൊന്നത്. ഒരു പ്രതിയെ വീട്ടില്‍ കയറി പിടികൂടുമ്പോള്‍ സ്വീകരിക്കേണ്ട നിയമപരമായ നടപടികളൊന്നും നാളിതുവരെ ഒരു കേസിലും വരാപ്പുഴ പൊലിസ് അധികൃതര്‍ ചെയ്തിട്ടില്ലന്നും അദ്ദേഹം പറഞ്ഞു.