കാക്കനാട്: നികുതി വെട്ടിച്ച് സര്‍വിസ് നടത്തിയ നാല് അന്യസംസ്ഥാന ടൂറിസ്റ്റ് ബസുകള്‍ വാഹന വകുപ്പിന്റെ പരിശോധനയില്‍ പിടിയിലായി. പോണ്ടിച്ചേരി, തമിഴ്‌നാട് രജിസ്‌ട്രേഷനില്‍ ഉള്ള രണ്ടു വീതം ലക്ഷ്വറി ബസുകളാണ് ആര്‍.ടി.ഒ എന്‍ഫോഴ്‌മെന്റ് വിഭാഗം നടത്തിയ പരിശോധനയില്‍ കളമശ്ശേരി മുട്ടത്തിന് സമീപം പിടികൂടിയത്. സംസ്ഥാന നികുതി അടക്കാതെ ടൂറിസ്റ്റ് പെര്‍മിറ്റ് ഉപയോഗിച്ച് ഇതര സംസ്ഥാനങ്ങളിലേക്ക് പ്രധാന ജങ്ഷനുകളില്‍ നിന്നും യാത്രക്കാരെ കയറ്റി അനധികൃത റൂട്ട് സര്‍വീസ് നടത്തുകയായിരുന്നു പിടികൂടിയ വാഹനങ്ങള്‍.
ഓണ്‍ലൈന്‍ ആപ്ലിക്കേഷന്‍ വഴിയാണ് യാത്രക്കാര്‍ ബസ് ബുക്ക് ചെയ്തിരുന്നത്. സീറ്റൊന്നിന് 3000 രൂപയും ബെര്‍ത്തിന് 4000 രൂപയും ആണ് ത്രെമാസ നികുതി. അത്തരത്തില്‍ 30 സീറ്റും 15 ബെര്‍ത്തും ഉള്ള പിടികൂടിയ ബസൊന്നിന് ഒന്നര ലക്ഷത്തോളം നികുതി അടക്കണം. പുതിയ നിയമം അനുസരിച്ച് നികുതി വെട്ടിപ്പ് നടത്തിയാല്‍ 100ശതമാനം പിഴയും ഒടുക്കണം. ബസ് ഒന്നിന് മൂന്ന് ലക്ഷം രൂപ പ്രകാരം 12 ലക്ഷത്തോളം രൂപ നികുതിയും പിഴയും ഉള്‍പ്പെടെ ഒടുക്കേണ്ടി വരും. പിടികൂടിയ ബസുകള്‍ കലക്ടറേറ്റ് വളപ്പിലേക്ക് മാറ്റി.
എന്‍ഫോഴ്‌സ്‌മെന്റ് ആര്‍.ടി.ഒ കെ.എം ഷാജിയുടെ നിര്‍ദേശാനുസരണം മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ജോര്‍ജ് തോമസിന്റെ നേതൃത്വത്തിലാണ് പരിശോധന നടത്തിയത്. അസിസ്റ്റന്റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരായ കെ.എസ് നിബി, സ്മിത ജോസ്, മെല്‍വിന്‍ ക്ലീറ്റസ്, പി.കെ ബാബു, വിപിന്‍ലാല്‍ എന്നിവര്‍ പരിശോധന സംഘത്തോടൊപ്പം ഉണ്ടായിരുന്നു.