കിളിമാനൂര്‍ (തിരുവനന്തപുരം ): മടവൂരില്‍ മുന്‍ റേഡിയോ ജോക്കി രാജേഷിനെ വെട്ടിക്കൊലപ്പെടുത്തിയ സംഭവത്തില്‍ രണ്ടുപേരെ കൂടി അന്വേഷണ സംഘം അറസ്റ്റ് ചെയ്തു. പ്രധാന പ്രതികളിലൊരാളായ കായംകുളം കളത്തില്‍ ഹൗസില്‍ അപ്പുണ്ണി എന്ന അപ്പു (32), ഇയാളുടെ ബന്ധു ചെന്നിത്തല തൃപ്പേരുംതുറ മതിച്ചുവട് സുമിത്ത് (34) എന്നിവരാണ് അറസ്റ്റിലായത്. അപ്പുണ്ണിയെ ഒളിവില്‍ കഴിയാന്‍ സഹായിച്ചതിനാണ് സുമിത്തിനെ അറസ്റ്റ് ചെയ്തത്.
ഒളിവില്‍ കഴിയുന്നതിനിടെ തിരുവനന്തപുരം പേട്ടയില്‍ നിന്നാണ് ഇവരെ പിടികൂടിയത്. ഇതോടെ കേസില്‍ ഏഴു പേര്‍ അറസ്റ്റിലായി. ക്വട്ടേഷന്‍ നല്‍കിയെന്ന് സംശയിക്കുന്ന അബ്ദുല്‍ സത്താര്‍ ഇപ്പോഴും ഖത്തറിലാണ്. ഇയാളെയും ഉടന്‍ നാട്ടിലെത്തിക്കാനാകുമെന്നാണ് അന്വേഷണ സംഘം നല്‍കുന്ന സ ൂചന.
അലിഭായി എന്നറിയപ്പെടുന്ന ഓച്ചിറ മേമന പനച്ചമൂട്ടില്‍ വീട്ടില്‍ മുഹമ്മദ് സാലിഹ് (26),കുലശേഖരപുരം കൊച്ചയത്ത് തെക്കേതില്‍ വീട്ടില്‍ തന്‍സീര്‍ (24), കൊല്ലം ശക്തി കുളങ്ങര കുന്നിന്മേല്‍ ചേരിയില്‍ ആലോട്ട് തെക്കതില്‍ വീട്ടില്‍ സനു (33) , ഓച്ചിറ മേമന വലിയകുളങ്ങര എം.എ കോട്ടേജില്‍ യാസിന്‍ മുഹമ്മദ് (23), കുണ്ടറ ചെറുമൂട് എല്‍.എസ് .നിലയത്തില്‍ സ്വാതി സന്തോഷ് (23) , മുളവന വില്ലേജില്‍ കാഞ്ഞിരോട് ചേരിയില്‍ പനയംകോട് പുത്തന്‍ വീട്ടില്‍ എബി ജോണ്‍ (27) എന്നിവരാണ് കേസില്‍ നേരത്തേ അറസ്റ്റിലായത്.
അറസ്റ്റിലായ അപ്പുണ്ണിയെ കൊല നടന്ന സ്ഥലത്തെത്തിച്ച് തെളിവെടുപ്പ് നടത്തി. കൃത്യം ആസൂത്രണം ചെയ്തവരിലെ പ്രധാനി ഇയാളാണെന്നാണ് പൊലിസ് പറയുന്നത്.
കഴിഞ്ഞ മാസം 27 ന് പുലര്‍ച്ചെ രണ്ടു മണിയോടെയാണ് മടവൂര്‍ സ്വദേശി രാജേഷിനെ (35) വെട്ടിക്കൊലപ്പെടുത്തിയത്.