കൊച്ചി: വരാപ്പുഴ കസ്റ്റഡി മരണക്കേസുമായി ബന്ധപ്പെട്ട് മൂന്ന് പൊലിസുകാര്‍ അറസ്റ്റില്‍. സന്തോഷ് കുമാര്‍, സുമേഷ്‌, ജിതിന്‍രാജ് എന്നീ ഓഫിസര്‍മാരാണ് അറസ്റ്റിലായവര്‍. റൂറല്‍ എസ്.പി എ.വി ജോര്‍ജിന്റെ നിയന്ത്രണത്തിലുള്ള സ്‌പെഷ്യല്‍ ടാസ്‌ക് ഫോഴ്‌സായ റൂറല്‍ ടൈഗര്‍ ഫോഴ്‌സിലെ (ആര്‍.ടി.എഫ്) ഉദ്യോഗസ്ഥരാണ് മൂവരും. ആലുവ പൊലിസ് ക്ലബ്ബില്‍ വച്ച് ഇവരെ ചോദ്യം ചെയ്ത ശേഷമാണ് അറസ്റ്റ് രേഖപ്പെടുത്തിയത്. ശ്രീജിത്തിന്റെ വീട്ടില്‍ കടന്നു കയറി ശ്രീജിത്തിനെ ആറസ്റ്റു ചെയ്തുകൊണ്ടുപോയി മര്‍ദ്ദിച്ചവരാണ് ഈ മൂന്ന് ഉദ്യോഗസ്ഥരും.

മൂന്ന് പൊലിസ് ഉദ്യോഗസ്ഥര്‍ക്കു പുറമെ കേസുമായ് ബന്ധപ്പെട്ട മറ്റ് ഉയര്‍ന്ന ഉദ്യോഗസ്ഥരെയും അറസ്റ്റ് ചെയ്യണമെന്നാണ് ശ്രീജിത്തിന്റെ ബന്ധുക്കള്‍ ആവശ്യപ്പെടുന്നത്. അതേസമയം കൃത്യമായ തെളിവുകളുടെ അടിസ്ഥാനത്തിലാണ് മൂന്ന് പേരെയും അറസ്റ്റ് ചെയ്തതെന്ന് ക്രൈം ബ്രാഞ്ച് ഐ.ജി ശ്രീജിത്ത്‌ പറഞ്ഞു. ശ്രീജിത്തിന്റെ മരണവുമായി നേരിട്ട് ബന്ധമുള്ളവരെയാണ് അറസ്റ്റ് ചെയ്തതെന്നും മെഡിക്കല്‍ബോര്‍ഡ് റിപ്പോര്‍ട്ട്‌ കിട്ടിയ ശേഷം കൂടുതല് അറസ്റ്റ് ഉണ്ടാവാന്‍ സാധ്യതയുണ്ടെന്നും അദ്ദേഹം പറഞ്ഞു.