കുറ്റ്യാടി: നരിക്കൂട്ടുംചാല്‍ രാജീവ് നഗറില്‍ നിര്‍ത്തിയിട്ടിരുന്ന സ്വകാര്യ ബസിന്റെ മുന്‍ഭാഗത്തെ ചില്ലുകള്‍ അജ്ഞാതര്‍ തകര്‍ത്ത സംഭവത്തില്‍ കുറ്റ്യാടി പൊലിസ് അന്വേഷണം ഊര്‍ജിതമാക്കി.
അക്രമിക്കപ്പെട്ട ബസ് അറ്റകുറ്റപണികള്‍ക്കായി ഇന്നലെ വര്‍ക്ക്‌ഷോപ്പിലേക്ക് മാറ്റി. വടകര തൊട്ടില്‍പ്പാലം റൂട്ടില്‍ സര്‍വിസ് നടത്തുന്ന രേവതി ബസാണ് തിങ്കളാഴ്ച അര്‍ധരാത്രിയോടെ തകര്‍ക്കപ്പെട്ടത്. റോഡരികില്‍ നിര്‍ത്തിയിട്ടിരുന്ന ബസിന്റെ മുന്‍ഭാഗത്തെ ചില്ലുകള്‍ കരിങ്കല്ലുകള്‍ ഉപയോഗിച്ച് എറിഞ്ഞ് തകര്‍ക്കുകയായിരുന്നു.
അക്രമണത്തില്‍ ബസിന്റെ മുന്‍ഭാഗത്തെ ചില്ലുകള്‍ പൂര്‍ണമായും തകര്‍ന്നിട്ടുണ്ട്. എറിഞ്ഞ കരിങ്കല്ലുകള്‍ ബസിനകത്തു നിന്ന് പൊലിസ് കണ്ടെടുത്തു. വടകരയില്‍ നിന്നും കുറ്റ്യാടി ഭാഗത്തേയ്ക്ക് രാത്രിയാത്രാ ബുദ്ധിമുട്ട് പരിഹരിക്കുന്നതിനായി ഒരു കൂട്ടം ചെറുപ്പക്കാര്‍ മുന്‍കൈ എടുത്ത് സര്‍വിസ് ആരംഭിച്ച ബസാണിത്. ഇതിനിടെ യാതൊരുവിധ അനിഷ്ട സംഭവങ്ങളും നിലവിലില്ലാത്ത പ്രദേശത്ത് അവിചാരിതമായുണ്ടായ അക്രമ സംഭവത്തില്‍ കക്ഷിരാഷ്ട്രീയ ഭേദമന്യേ വ്യാപക പ്രതിഷേധമാണ് ഉയരുന്നത്.
സമാധാനഭംഗം ഉണ്ടാക്കാനുള്ള സാമൂഹിക ദ്രോഹികളുടെ നീക്കത്തിനെതിരേ നരിക്കൂട്ടുംചാല്‍ ടൗണ്‍ കോണ്‍ഗ്രസ്, യൂത്ത് കോണ്‍ഗ്രസ് കമ്മിറ്റികള്‍ പ്രതിഷേധിച്ചു. കുറ്റക്കാര്‍ക്കെതിരേ കര്‍ശന നടപടിയെടുക്കണമെന്ന് യോഗം ആവശ്യപ്പെട്ടു. സംഭവത്തില്‍ പ്രതിഷേധിച്ച് ഡിവൈ.എഫ്.ഐ നഗറില്‍ പ്രതിഷേധ പോസ്റ്റര്‍ പതിച്ചു. ഇതിനു മുന്‍പ് നഗറിലെ രാജീവ് ഗാന്ധി സ്മാരക ബസ് കാത്തിരിപ്പ് കേന്ദ്രം സമൂഹിക ദ്രോഹികളാല്‍ നശിപ്പിക്കപ്പെട്ടിരുന്നു. കൃത്യം നടത്തിവരെ സമീപത്തെ കായക്കൊടി സര്‍വിസ് സഹകരണ ബാങ്കിന്റെ സി.സി.ടി.വി ദൃശ്യങ്ങളുടെ സഹായത്തോടെയാണ് അന്ന് തിരിച്ചറിഞ്ഞത്.