അങ്ങാടിപ്പുറം: ദേശീയ സ്‌കൂള്‍ ഗെയിംസില്‍ പങ്കെടുക്കുവാനായി കടുങ്ങപുരം ഗവ. ഹയര്‍ സെക്കന്‍ഡറി സ്‌കൂളിലെ പെണ്‍ താരങ്ങള്‍ പഞ്ചാബിലേക്ക്. കേരള സ്‌കൂള്‍ ഹോക്കി ടീമില്‍ ആദ്യമായാണ് ജില്ലയില്‍നിന്നു പെണ്‍കുട്ടികള്‍ ഇടം നേടുന്നത്.
അഞ്ചുവര്‍ഷമായി ജില്ലയുടെ ജഴ്‌സിയണിഞ്ഞ് സംസ്ഥാന മത്സരത്തില്‍ പങ്കെടുക്കുന്ന കെ.കെ റിന്‍ഷിത, ടി. ബാസിമ നൗറിന്‍ എന്നീ വിദ്യാര്‍ഥിനികളാണ് സീനിയര്‍ ടീമില്‍ ഇടം നേടിയത്. ഇന്തോനേഷ്യയില്‍ നടന്ന അന്താരാഷ്ട്ര ഹോക്കി മത്സരത്തിലും റിന്‍ഷിത പങ്കെടുത്തിട്ടുണ്ടണ്ട്. ഒരാഴ്ചയായി തൃശൂരില്‍ നടക്കുന്ന സംസ്ഥാന ഹോക്കി ക്യാംപില്‍ പരിശീലനത്തിലാണിപ്പോള്‍ ഈ മിടുക്കികള്‍. 23 മുതല്‍ ജലന്ധറിലാണ് ദേശീയ സ്‌കൂള്‍ ഹോക്കി ചാംപ്യന്‍ഷിപ്പ് നടക്കുന്നത്. മത്സരത്തില്‍ പങ്കെടുക്കുന്നതിനായി ടീം ഇന്ന് യാത്ര പുറപ്പെടും. സ്‌കൂളില്‍ നടന്ന അനുമോദനച്ചടങ്ങില്‍ പുഴക്കാട്ടിരി ഗ്രാമ പഞ്ചായത്തംഗം മുഹമ്മദ് ഫസലുദ്ദീന്‍ ഇ, പി.ടി.എ പ്രസിഡന്റ് കരുവാടി കുഞ്ഞാപ്പ, പ്രധാനധ്യാപിക കെ. ലത, പരിശീലകരായ വി. സജാത് സാഹിര്‍, സി. അലവിക്കുട്ടി പങ്കെടുത്തു.