റിയാദ്: സഊദിയിൽ സന്ദർശനം നടത്തുന്ന വത്തിക്കാനിലെ പ്രതിനിധി കർദിനാൾ ജീൻ ലൂയിസ് തൗറാൻ സഊദി ഭരണാധികാരി സൽമാൻ ബിൻ അബ്ദുൽ അസീസ് രാജാവുമായി കൂടിക്കാഴ്ച നടത്തി.

 

തലസ്ഥാന നഗരിയായ റിയാദിലെ അൽ യമാമഃ രാജ കൊട്ടാരത്തിലെത്തിയ അദ്ദേഹത്തെ സഊദി രാജാവിന്റെ നേതൃത്വത്തിൽ ഹൃദ്യമായ സ്വീകരണമാണ് നൽകിയത്. തുടർന്ന് രാജാവുമായി നടത്തിയ സുദീർഘമായ കൂടിക്കാഴ്ചയിൽ മതങ്ങൾ തമ്മിലുള്ള ഐക്യ സന്ദേശം വ്യാപിപ്പിക്കണമെന്നു ഇരു കൂട്ടരും അഭിപ്രായപ്പെട്ടു. ബഹു മത സംവാദത്തിനുള്ള വത്തിക്കാൻ പോർടിഫിക്കൽ കൗൺസിൽ അധ്യക്ഷൻ കൂടിയാണ് കർദിനാൾ തൗറാൻ. കഴിഞ്ഞ വെള്ളിയാഴ്ചയാണ് സംഘത്തോടൊപ്പം അദ്ദേഹം സഊദിയിലെത്തിയത്. 

 

ലോക സുരക്ഷക്ക് വിവിധ വിശ്വാസ ധാരകളിൽ ഉള്ളവർ പരസ്പരം മനസ്സറിഞ്ഞു പ്രവർത്തിക്കണമെന്നും തീവ്രവാദത്തെയും അക്രമങ്ങളെയും തള്ളിപ്പറയണമെന്നും ഇരുവരും അഭിപ്രായപ്പെട്ടു. സഊദി ആഭ്യന്തര മന്ത്രി അമീർ അബ്ദുൽ അസീസ് ബിൻ സഊദ്, മുസ്ലിം വേൾഡ് ലീഗ് സെക്രട്ടറി ജനറൽ ഡോ:മുഹമ്മദ് ബിൻ അബ്ദുൽ കരീം അൽ ഈസ, വിദേശ കാര്യ മന്ത്രി ആദിൽ അൽ ജുബൈർ, തുടങ്ങിയവർ കൂടിക്കാഴ്ചയിൽ പങ്കെടുത്തു.