കരുനാഗപ്പള്ളി(കൊല്ലം): മൂന്ന് ദിവസങ്ങള്‍ക്ക് മുന്‍പ് തിരുവനന്തപുരം എസ്.എ.ടി ആശുപത്രിയില്‍ നിന്ന് കാണാതായ യുവതിയെ കരുനാഗപ്പള്ളിയില്‍ കണ്ടെത്തി. കെ.എസ്.ആര്‍.ടി.സി ബസ്റ്റാന്റിന് മുന്നില്‍ ഇന്നലെ വൈകിട്ട് ഏറെനേരം അലഞ്ഞുതിരിഞ്ഞ് നടന്ന യുവതിയെക്കണ്ട് സംശയം തോന്നിയ ഓട്ടോ ഡ്രൈവര്‍മാര്‍ വിവരം അടുത്തുള്ള ട്രാഫിക് വാര്‍ഡനെ അറിയിക്കുകയായിരുന്നു.
പൊലിസെത്തി കാണാതായ യുവതിയാണെന്ന് സ്ഥിരീകരിച്ചതോടെ താലൂക്ക് ആശുപത്രിയില്‍ എത്തിച്ചു. അവിടെ നടത്തിയ പരിശോധനയില്‍ യുവതി ഗര്‍ഭിണിയല്ലെന്നു കണ്ടെത്തി.
തുടര്‍ന്ന് പൊലിസ് ഇവരെ പൊലിസ് സ്‌റ്റേഷനിലെത്തിച്ച് വിശദമായി ചോദ്യം ചെയ്തശേഷം ബന്ധുക്കളെ വിളിച്ചുവരുത്തി. സന്ധ്യയോടെ ഭര്‍ത്താവും ബന്ധുക്കളുമെത്തി യുവതിയെ കൂട്ടിക്കൊണ്ടുപോയി.
എസ്.എ.ടി ആശുപത്രിയില്‍ പ്രസവത്തിനെന്ന് പറഞ്ഞെത്തിയ യുവതിയെ പരിശോധനകള്‍ക്കായി പോയശേഷം കാണാതാവുകയായിരുന്നു. യുവതി ഗര്‍ഭിണിയായി അഭിനയിക്കുകയായിരുന്നുവെന്ന് പൊലിസ് പറഞ്ഞു.