കാസര്‍കോട്: സുന്നി മഹല്ല് ഫെഡറേഷന്‍ (എസ്.എം.എഫ്) സംസ്ഥാന സമ്മേളനം ലൈറ്റ് ഓഫ് മദീന ഇന്ന് തൃക്കരിപ്പൂരിലെ കൈതക്കാട് ആരംഭിക്കും. വൈകിട്ട് 4 മണിക്ക് പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത കേരള ജംഇയ്യത്തുല്‍ ഉലമാ ജന. സെക്രട്ടറി പ്രൊ. കെ. ആലിക്കുട്ടി മുസ്‌ലിയാര്‍ അധ്യക്ഷനാകും. പി.കെ.പി അബ്ദുസ്സലാം മുസ്‌ലിയാര്‍, ഡോ.ബഹാഉദ്ദീന്‍ മുഹമ്മദ് നദ്‌വി, അബ്ദുസമദ് പൂക്കോട്ടൂര്‍ സംസാരിക്കും.
അയ്യായിരത്തിലധികം മഹല്ലുകളില്‍ നിന്ന് ഓണ്‍ലൈനായി രജിസ്റ്റര്‍ ചെയ്തവര്‍ക്ക് മാത്രം പ്രവേശനമുള്ള ലൈറ്റ് ഓഫ് മദീനയില്‍ പങ്കെടുക്കുന്നവര്‍ക്കായി പ്രത്യേക മൊബൈല്‍ ആപ്ലിക്കേഷന്‍ ഗൂഗിള്‍ പ്ലേ സ്റ്റോറില്‍ ലൈറ്റ് ഓഫ് മദീന എന്ന പേരില്‍ ലഭ്യമാണ്. വൈകിട്ട് നാലു മണിക്ക് നടക്കുന്ന ഉദ്ഘാടന പൊതുസമ്മേളനത്തില്‍ സമസ്ത കേരള ജംഇയ്യത്തുല്‍ ഉലമായുടെ മുഴുവന്‍ പോഷക സംഘടനാ ഭാരവാഹികളും പ്രവര്‍ത്തകരും പങ്കെടുക്കണമെന്ന് ലൈറ്റ് ഓഫ് മദീന ചെയര്‍മാന്‍ ടി.കെ പൂക്കോയ തങ്ങള്‍ ചന്തേര അഭ്യര്‍ഥിച്ചു.