ഏതന്‍സ്: അഭയാര്‍ഥിപ്രവാഹം തുടരുന്നതിനിടെ ലിബിയന്‍ കടല്‍തീരത്തുണ്ടായ ബോട്ടപകടത്തില്‍ മരിച്ച ആറു കുട്ടികളടക്കം 117 പേരുടെ മൃതദേഹങ്ങള്‍ കണ്ടെത്തി. മരിച്ചവരില്‍ ഭൂരിഭാഗവും ആഫ്രിക്കന്‍ അഭയാര്‍ഥികളാണ്. അപകടത്തില്‍പ്പെട്ട 340 പേരെ നേരത്തെ രക്ഷപ്പെടുത്തിയിരുന്നു. ലിബിയന്‍ സിറ്റിയായ സ്വാരയില്‍ നിന്നാണ് വെള്ളിയാഴ്ചയും ഇന്നലെയുമായി മൃതദേഹങ്ങള്‍ കണ്ടെത്തിയതെന്ന് ലിബിയന്‍ റെഡ്‌ക്രോസ് വക്താവ് മുഹമ്മദ് അല്‍ മുസ്‌റാത്തി പറഞ്ഞു. മരിച്ചവരാരും ലൈഫ് ജാക്കറ്റ് ഉപയോഗിച്ചിട്ടില്ലെന്നും മരണസംഖ്യ ഉയരാന്‍ സാധ്യതയുണ്ടന്നും അദ്ദേഹം കൂട്ടിച്ചേര്‍ത്തു. സുരക്ഷിതമല്ലാത്ത ബോട്ട്‌യാത്രയിലൂടെ അപടത്തില്‍ മരിക്കുന്ന അഭയാര്‍ഥികളുടെ എണ്ണം മെയ് 25 മുതല്‍ ഇതുവരെ 1000 കവിഞ്ഞു. ഉത്തര ആഫ്രിക്കയില്‍ നിന്നും തെക്കന്‍ യൂറോപ്പിലേക്കാണ് ഭൂരിഭാഗം ആളുകളും പലായനം ചെയ്യുന്നത്.