വിഴിഞ്ഞം: കൊലപാതകം ഉള്‍പ്പെടെയുള്ള കേസുകളിലെ പ്രതിയെ കാഞ്ഞിരംകുളം പൊലിസ് പിടികൂടി. പയറ്റുവിള പുത്തളം പുത്തന്‍വിളാകത്ത് കിഴക്കരികില്‍ വീട്ടില്‍ ജിം ബിനു എന്നു വിളിക്കുന്ന ബിനുവിനെ (33)യാണ് കാഞ്ഞിരംകുളം എസ്.ഐ പ്രതാപചന്ദ്രന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
രണ്ടു പേരെ ആക്രമിച്ച ശേഷം ഒളിവില്‍ പോയ പ്രതി നാട്ടില്‍ തിരിച്ചെത്തിയപ്പോഴാണു പൊലിസ് പിടികൂടിയത്. പൊലിസ് എത്തുന്നതിന് തൊട്ടു മുന്‍പും ഇയാള്‍ ഇറച്ചിക്കടക്കാരനെ ഭീഷണിപ്പെടുത്തി പണം അപഹരിച്ചതായും ഡി.വൈ.എഫ്.ഐയുടെ കൊടിമരം നശിപ്പിച്ചതായും പൊലിസ് അറിയിച്ചു. പയറ്റുവിളയില്‍ ആറു മാസം മുന്‍പു നടന്ന കൊലപാതക കേസില്‍ ജിം ബിനു പ്രതിയാണ്.
വിഴിഞ്ഞം, മെഡിക്കല്‍ കോളജ്, കാഞ്ഞിരംകുളം തുടങ്ങിയ സ്റ്റേഷനുകളിലായി ഇയാല്‍ക്കെതിരെ വധശ്രമം, പിടിച്ചുപറി തുടങ്ങി പതിനഞ്ചോളം കേസുകളുണ്ടെന്നും കോടതിയില്‍ ഹാജരാക്കിയ പ്രതിയെ കോടതി റിമാന്‍ഡു ചെയ്തതായും പൊലിസ് പറഞ്ഞു.