കൊടുങ്ങല്ലൂര്‍: ഇനി പൊലിസിനെ മാത്രമല്ല പൊലിസ് ജീപ്പിനെയും പേടിക്കണം. ക്രമസമാധാന പാലനത്തിന്റെ ഭാഗമായി പൊലിസ് ജീപ്പുകളില്‍ ക്യാമറകള്‍ സ്ഥാപിച്ചു. കൊടുങ്ങല്ലൂര്‍ പൊലിസ് സ്റ്റേഷനിലെ സി.ഐയും എസ്.ഐയും ഉപയോഗിക്കുന്ന ജീപ്പുകളിലാണു ക്യാമറകള്‍ സ്ഥാപിച്ചിട്ടുള്ളത്. ക്രമസമാധാന പ്രശ്‌നസാധ്യതയുള്ള പ്രദേശങ്ങളിലെ പൊലിസ് വാഹനങ്ങളില്‍ ക്യാമറ സ്ഥാപിച്ചതു വഴി തീരദേശ മേഖലകളിലും മറ്റും പട്രോളിംഗ് നടത്തുന്നതിനു പുറമെ സാമൂഹ്യ വിരുദ്ധരുടെ മേലുള്ള നിരീക്ഷണം കൂടുതല്‍ കാര്യക്ഷമമാകും. നിലവിലെ പ്രത്യേക സാഹചര്യങ്ങള്‍ കൂടി കണക്കിലെടുത്താണു വാഹനങ്ങളില്‍ ക്യാമറ സ്ഥാപിച്ചിട്ടുള്ളത്. വാഹന പരിശോധന നടത്തുന്ന സമയത്തും ഇതേറെ ഉപകരിക്കും. കൈ കാണിച്ചു നിറുത്താതെ പോകുന്ന വാഹനങ്ങളുടെ നമ്പര്‍ സഹിതം ഇതില്‍ റെക്കോര്‍ഡ് ചെയ്യാന്‍ കഴിയും.