ക്വാലാലംപൂര്‍: മലേഷ്യയില്‍ ഫലസ്തീനി സര്‍വകലാശാലാ അധ്യാപകന്‍ വെടിയേറ്റു മരിച്ചു. എന്‍ജിനീയറിങ് അധ്യാപകനായ ഫാദി അല്‍ ബത്ഷ് ആണ് കൊല്ലപ്പെട്ടത്.
ബൈക്കിലെത്തിയ യൂറോപ്യന്‍ മുഖച്ഛായയുള്ള രണ്ടു പേര്‍ 35കാരനായ ഫാദിക്കു നേരെ പത്തു തവണ നിറയൊഴിക്കുകയായിരുന്നു. ഉടന്‍ ഇരുവരും രക്ഷപ്പെടുകയും ചെയ്തു.
നാല് വെടിയുണ്ടകള്‍ ഫാദിയുടെ ശരീരത്തില്‍നിന്നും ബാക്കിയുള്ളവ സംഭവസ്ഥലത്തുനിന്നും കണ്ടെത്തിയതായി പൊലിസ് പറഞ്ഞു. വിദേശ രഹസ്യാന്വേഷണ ഉദ്യോഗസ്ഥരാണ് ആക്രമികളെന്നു സംശയിക്കുന്നതായി മലേഷ്യന്‍ ഡെപ്യൂട്ടി പ്രധാനമന്ത്രി അഹ്മദ് സാഹിദ് ഹമീദി അറിയിച്ചു. യൂറോപ്യന്‍ പൗരന്മാരാണെന്നാണു സംശയിക്കപ്പെടുന്നത്.
മലേഷ്യയിലെ ഫലസ്തീന്‍ അംബാസഡര്‍ അന്‍വര്‍ അല്‍ ആഗയാണു കൊല്ലപ്പെട്ടത് ഫാദിയാണെന്നു സ്ഥിരീകരിച്ചത്. ഫലസ്തീന്‍ അനുകൂല സര്‍ക്കാര്‍ സംഘടനകളില്‍ സജീവമായിരുന്നു ഫാദി. ഇലക്ട്രിക്കല്‍ എന്‍ജിനീയറിങ്ങിലും റോക്കറ്റ് നിര്‍മാണത്തിലും വിദഗ്ധന്‍ കൂടിയാണ് ഈ യുവ അധ്യാപകന്‍.