കൊണ്ടോട്ടി: പൊതുനിരത്തില്‍ പുകവലിക്കാരുടെ ശല്യം കുറയുമ്പോള്‍ കുട്ടികള്‍ക്ക് പുകയില ഉല്‍പന്നങ്ങള്‍ കൈമാറുന്നതും വിദ്യാഭ്യാസ സ്ഥാപനങ്ങളുടെ സമീപം വില്‍ക്കുന്നതും വര്‍ധിക്കുന്നു.
കഴിഞ്ഞ വര്‍ഷം പുകവലിച്ചതിന് 1,62,606 കേസുകളാണ് രജിസ്റ്റര്‍ ചെയ്തത്. എന്നാല്‍ തൊട്ടുമുന്‍പുള്ള വര്‍ഷം 2,05,157 കേസുകളുണ്ടായിരുന്നു.
പുകവലിക്കാര്‍ക്കെതിരേ പിഴ കടുപ്പിച്ചതാണ് കേസുകള്‍ കുറയാന്‍ കാരണമായത്. കഴിഞ്ഞ വര്‍ഷം1,62,606 പേരില്‍ നിന്നായി 3,38,93,900 രൂപയാണ് പിഴയിനത്തില്‍ ലഭിച്ചത്. എന്നാല്‍ 2016ല്‍ 2,01,085 പേരില്‍ നിന്നായി 4,17,00800 രൂപ പിഴയായി ലഭിച്ചു.
ഈ വര്‍ഷം ജനുവരിയിലും ഫെബ്രുവരിയിലും പുകവലി മുന്‍വര്‍ഷങ്ങളെ അപേക്ഷിച്ച് കുറവാണ്.
18 വയസിന് താഴെയുള്ള കുട്ടികള്‍ക്ക് പുകയില ഉല്‍പന്നങ്ങള്‍ കൈമാറല്‍, വിദ്യാഭ്യാസ സ്ഥാപനങ്ങളുടെ സമീപം ഉല്‍പന്നങ്ങള്‍ വില്‍ക്കല്‍ തുടങ്ങിയ കേസുകള്‍ വര്‍ധിക്കുകയാണ്.
കഴിഞ്ഞ വര്‍ഷം കുട്ടികള്‍ക്ക് പുകയില ഉല്‍പന്നങ്ങള്‍ എത്തിച്ചതിന് 714 പേരാണ് പിടിയിലായത്. തൊട്ടുമുന്‍പുള്ള വര്‍ഷം 642 കേസുകള്‍ മാത്രമായിരുന്നു.
സ്‌കൂള്‍ പരിസരത്ത് പുകയില ഉല്‍പന്നങ്ങളുടെ വില്‍പന നടത്തിയതിന് 3786 കേസുകളുണ്ടായി. എന്നാല്‍ 2016ല്‍ 3065 കേസുകള്‍ മാത്രമായിരുന്നു.
ഇക്കഴിഞ്ഞ ജനുവരി,ഫെബ്രുവരി മാസങ്ങളില്‍ മാത്രം സമാന കേസില്‍ 110 പേരില്‍ നിന്ന് 41,650 രൂപ പിഴ ഈടാക്കി കേസെടുത്തിട്ടുണ്ട്. സ്‌കൂള്‍ പരിസരത്ത് വില്‍പന നടത്തിയതിന് 464 പേരില്‍ നിന്ന് 124800 രൂപയും പിഴ ചുമത്തി.
സിഗരറ്റ് ആന്‍ഡ് ടുബാക്കോ പ്രൊഡക്ട് ആക്ട് 2003(സി ഒ.ടി.പി.എ)പ്രകാരമാണ് കേസെടുക്കുന്നത്. പുകയില ഉല്‍പന്നങ്ങളുടെ വില്‍പനക്ക് പരസ്യം നല്‍കുന്നതിനും പായ്ക്കറ്റുകളില്‍ ആരോഗ്യത്തിന് ഹാനികരമെന്ന് മുന്നറിയിപ്പ് നല്‍കാതെ വില്‍പന നടത്തുന്നതിനും സി ഒ.ടി.പി.എ പ്രകാരം പിഴചുമത്തുന്നുണ്ട്.