റിയാദ്: യമനില്‍ ദുരിതാശ്വാസ പ്രവര്‍ത്തനത്തിലേര്‍പ്പെട്ട റെഡ്‌ക്രോസ് അംഗം കൊല്ലപ്പെട്ടു. തായിസ് പ്രവിശ്യയിലെ തെക്കന്‍ നഗരത്തില്‍ ശനിയാഴ്ചയാണ് സംഭവം.
റെഡ്‌ക്രോസ് ആണ് ഇക്കാര്യം പുറത്തുവിട്ടത്. ആയുധധാരികളുടെ ആക്രമണത്തില്‍ തങ്ങളുടെ അംഗം കൊല്ലപ്പെട്ടതായി സന്‍ആ ആസ്ഥാനമായുള്ള റെഡ്‌ക്രോസ് ഓഫിസര്‍ അദ്‌നാന്‍ ഹിസാം പറഞ്ഞു. റെഡ്‌ക്രോസിന്റെ വാഹനവും ആക്രമണത്തില്‍ തകര്‍ന്നിട്ടുണ്ട്. കൊല്ലപ്പെട്ടയാളുടെ പേര് റെഡ്‌ക്രോസ് വെളിപ്പെടുത്തിയിട്ടില്ല.
അതിനിടെ, യമന്‍ സംഘര്‍ഷത്തില്‍ ദുരിതം അനുഭവിക്കുന്ന ജനങ്ങളുടെ സ്ഥിതി ഓരോ ദിനം കഴിയുന്തോറും കൂടിവരികയാണെന്ന് യമനിലെ റെഡ്‌ക്രോസ് അന്താരാഷ്ട്ര കമ്മിറ്റി പ്രതിനിധി അലക്‌സാണ്ടര്‍ ഫൈത്തി പറഞ്ഞു.
അസുഖം മൂലം കഴിഞ്ഞ ആറുമാസത്തിനിടെ രണ്ടായിരത്തിലധികം ആളുകള്‍ മരിച്ചതായും അദ്ദേഹം പറഞ്ഞു.