ബംഗളൂരു: എ.ബി ഡിവില്ല്യേഴ്‌സിന്റെ ബാറ്റിങ് കരുത്തില്‍ റോയല്‍ ചലഞ്ചേഴ്‌സ് ബാംഗ്ലൂരിന് ഐ.പി.എല്ലില്‍ രണ്ടാം ജയം. ഡല്‍ഹി ഡയര്‍ഡെവിള്‍സിനെ ആറ് വിക്കറ്റിനാണ് ബാംഗ്ലൂര്‍ വീഴ്ത്തിയത്. ആദ്യം ബാറ്റ് ചെയ്ത ഡല്‍ഹി അഞ്ച് വിക്കറ്റ് നഷ്ടത്തില്‍ 174 റണ്‍സെടുത്തപ്പോള്‍ ബാംഗ്ലൂര്‍ 18 ഓവറില്‍ നാല് വിക്കറ്റ് നഷ്ടത്തില്‍ 176 റണ്‍സെടുത്താണ് വിജയിച്ചത്. 39 പന്തില്‍ പത്ത് ഫോറും അഞ്ച് സിക്‌സും സഹിതം 90 റണ്‍സ് അടിച്ചെടുത്ത് പുറത്താകാതെ നിന്ന ഡിവില്ല്യേഴ്‌സിന്റെ മാരക ബാറ്റിങാണ് ബാംഗ്ലൂരിന്റെ ജയം അനായാസമാക്കിയത്. വിരാട് കോഹ്‌ലി 30 റണ്‍സെടുത്തു.
നേരത്തെ ടോസ് നേടി ബാംഗ്ലൂര്‍ ഡല്‍ഹിയെ ബാറ്റിങിനയക്കുകയായിരുന്നു. ആദ്യം ബാറ്റ് ചെയ്ത ഡല്‍ഹിയുടെ തുടക്കം തകര്‍ച്ചയോടെയായിരുന്നു. ജാസന്‍ റോയ് (അഞ്ച്), ക്യാപ്റ്റന്‍ ഗംഭീര്‍ (മൂന്ന്) എന്നിവര്‍ ക്ഷണത്തില്‍ മടങ്ങി. എന്നാല്‍ മൂന്നാം വിക്കറ്റില്‍ ഒത്തുചേര്‍ന്ന ശ്രേയസ് അയ്യര്‍- റിഷഭ് പന്ത് സഖ്യം മിന്നലടികളുമായി കളം നിറഞ്ഞതോടെയാണ് ഡല്‍ഹി ട്രാക്കിലായത്.
അവസാന ഘട്ടത്തില്‍ വമ്പനടികളുമായി റിഷഭ് പന്താണ് സ്‌കോര്‍ 170 കടത്തിയത്. ശ്രേയസ് 31 പന്തില്‍ മൂന്ന് സിക്‌സും നാല് ഫോറും സഹിതം 52 റണ്‍സെടുത്തു. റിഷഭ് പന്ത് 48 പന്തില്‍ ആറ് ഫോറും ഏഴ് സിക്‌സും സഹിതം 85 റണ്‍സ് വാരി. ബാംഗ്ലൂരിനായി യുസ്‌വേന്ദ്ര ചഹല്‍ രണ്ട് വിക്കറ്റെടുത്തു. ഉമേഷ് യാദവ്, വാഷിങ്ടന്‍ സുന്ദര്‍, ആന്‍ഡേഴ്‌സന്‍ എന്നിവര്‍ ഓരോ വിക്കറ്റെടുത്തു.