കോതമംഗലം: ജില്ലാ നിയമ സേവന അതോറിറ്റി സെക്രട്ടറിയും സബ്ബ് ജഡ്ജുമായ എ.എം ബഷീര്‍ കുട്ടമ്പുഴയിലെ ആദിവാസി കുടി സന്ദര്‍ശിക്കാനെത്തി. ആദിവാസി സമൂഹത്തിന്റെ ഉന്നമനത്തിനു വേണ്ടി കേന്ദ്ര സംസ്ഥാന സര്‍ക്കാര്‍ നടപ്പിലാക്കുന്ന പദ്ധതികള്‍ ഗുണഭോക്താക്കള്‍ക്ക് ലഭ്യമാകുന്നുണ്ടോ എന്ന് അറിയുന്നതിന് വേണ്ടിയും എത്താത്ത പദ്ധതികള്‍ ചൂഷണം ഇല്ലാതെ നിയമ സേവന അതോറിറ്റിയുടെ മേല്‍നോട്ടത്തില്‍ നടപ്പില്‍ വരുത്തുന്നതിനും വേണ്ടി 2015 ല്‍ ദേശീയ നിയമ സേവന അതോറിറ്റി രൂപം നല്‍കിയ പദ്ധതി പ്രകാരം എറണാകുളം ജില്ല നിയമ സേവന അതോറിറ്റി സെക്രട്ടറി (സബ് ജഡ്ജ്) എ.എം ബഷീര്‍ കുട്ടമ്പുഴ പഞ്ചായത്തിലെ എളംബ്ലാശ്ശേരികുടിയിലെത്തിയത്.
എളം ബ്ലാശേരി ഊരിലെ കുടിവെള്ള ക്ഷാമം, വിദ്യാഭ്യാസ സ്ഥാപനങ്ങളുടെ ശോചനീയാവസ്ഥ, പൊലിസ്, ഫോറസ്റ്റ്, എക്‌സൈസ് ഔട്ട് ാേസ്റ്റിന്റെ അഭാവം, ആശുപത്രിയുടെ അഭാവം, പ്രായമായവരുടെയും, വിധവകളുടെയും, പെണ്‍കുട്ടികളുടെയും, ഭര്‍ത്താക്കന്മാര്‍ ഉപേക്ഷിക്കപ്പെട്ട സ്ത്രീകളുടെ പുനരധിവാസം, തൊഴില്‍ ഇല്ലാത്തവരുടെ പ്രശ്‌നങ്ങള്‍, തുടങ്ങിയവയാണ് ബന്ധപ്പെട്ട വകുപ്പുകളുടെ സഹകരണത്തോടെ നിയമ സേവന അതോറിറ്റി പരിഹരിക്കാന്‍ പോകുന്നത്.
കുടിവെള്ള ക്ഷാമം നേരിടുന്നതിന് 5 കുഴല്‍ കിണറുകളുടെ ആവശ്യം ഉണ്ട്, 16 വൈദ്യുതികരിക്കാത്ത വീടുകളും ഉണ്ട്. പണി പൂര്‍ത്തിയാകാത്ത വീടുകളുടെ പൂര്‍ത്തീകരണം, ആധാര്‍, റേഷന്‍ കാര്‍ഡുകളുടെ വിതരണം, മുള നെയ്തുക്കാര്‍ക്കും, കൃഷികര്‍ക്കും ചൂഷണം തടയുന്നതിന് സൊസൈറ്റി രൂപീകരണം തുടങ്ങി നിരവധി പ്രവര്‍ത്തനനങ്ങളാണ് നിയമ സേവന അതോറിറ്റി വിവിധ വകുപ്പുകളുടെ സഹകരണത്തോടെ ഈ വര്‍ഷം മേയ് മാസത്തില്‍ നടപ്പില്‍ വരുത്തുന്നത്. ചടങ്ങില്‍ ജില്ലാ നിയമ സേവന അതോറിറ്റി സെക്രട്ടറി (സബ് ജഡ്ജ്) എ.എം ബഷീര്‍, താലൂക്ക് ലീഗല്‍ സര്‍വീസസ് കമ്മിറ്റി സെക്രട്ടറി ടി.ഐ സുലൈമാന്‍, ട്രൈബല്‍ ഓഫിസര്‍, വാര്‍ഡ് മെമ്പര്‍ അരുണ്‍, പൊലിസ്, ഫോറസ്റ്റ് ഓഫീസര്‍മാര്‍, കാണിക്കാരന്‍, ഊരു മൂപ്പന്‍ പാരാ ലീഗല്‍ വോളണ്ടീര്‍മാര്‍തുടങ്ങിയവര്‍ സംബന്ധിച്ചു.