മലപ്പുറം: നഷ്ടമായ നാട്ടുപച്ച വീണ്ടെടുക്കാന്‍ ജില്ലയില്‍ പരിസ്ഥിതി സ്‌നേഹികളുടെ കൂട്ടയജ്ഞം. ലോക പരിസ്ഥിതി ദിനാചരണത്തിന്റെ ഭാഗമായാണു ജില്ലയിലുടനീളം വിവിധ പരിപാടികളാണ് ഇന്നലെ നടന്നത്. വൃക്ഷത്തൈകള്‍ നട്ടും നിലവിലുള്ള സസ്യങ്ങള്‍ പരിപാലിച്ചുമാണു വിദ്യാര്‍ഥികള്‍, വിവിധ സംഘടനകള്‍, ഉദ്യോഗസ്ഥര്‍, വിവിധ തൊഴിലാളികള്‍ എന്നിവരുടെ നേതൃത്വത്തില്‍ ജില്ലയില്‍ ഉടനീളം പരിസ്ഥിതി ദിനാചരണം നടന്നത്. ലോക പരിസ്ഥിതി ദിനമായ ഇന്നലെ സ്‌കൂളുകള്‍ക്ക് അവധിയായിരുന്നെങ്കിലും വിദ്യാര്‍ഥികളും അധ്യാപകരും സ്‌കൂളുകളില്‍ കൂട്ടമായി എത്തിയാണു പരിസ്ഥിതി ദിനാചരണം നടത്തിയത്.
വിദ്യാലയങ്ങള്‍ സ്ഥിതി ചെയ്യുന്ന പ്രദേശത്തെ ദത്തുഗ്രാമം പദ്ധതിയിലൂടെ എന്‍.എസ്.എസിന്റെ നേതൃത്വത്തില്‍ മരങ്ങള്‍ നട്ടുപിടിപ്പിച്ചു.  തണല്‍ മരങ്ങള്‍ക്കും ഫലവൃക്ഷങ്ങള്‍ക്കും പ്രാധാന്യം നല്‍കിയാണു പ്രവര്‍ത്തനം നടപ്പാക്കിയത്. ദിനാചരണത്തിന്റെ ഭാഗമായി ജല സ്രോതസുകള്‍, പുഴകള്‍, കനാലുകള്‍, കുളങ്ങള്‍ എന്നിവയുടെ  ശുദ്ധീകരണം, സംരക്ഷണം   എന്നിവയും നടന്നു.  വിവിധ സന്നദ്ധ സംഘടനകളുടെയും ക്ലബ്ബുകളുടെയും നേതൃത്വത്തില്‍ മത്സര പരിപാടികളും സംഘടിപ്പിച്ചിരുന്നു.