പേരൂര്‍ക്കട: ട്രാന്‍സ്ജന്‍ഡറെയും ഒപ്പമുണ്ടായിരുന്ന സ്ത്രീയേയും അധിക്ഷേപിക്കുകയും ആക്രമിക്കുകയും ചെയ്ത സംഭവുമായി ബന്ധപ്പെട്ട് അറസ്റ്റിലായ രണ്ട് പേര്‍ റിമാന്‍ഡില്‍. പാതിരിപ്പള്ളി ഇളയമ്പള്ളിക്കോണം സ്വദേശികളായ ദീപക്ക്, അഖില്‍ എന്നിവരാണ് റിമാന്‍ഡിലായത്.
ഏപ്രില്‍ 13നായിരുന്നു കേസിന്നാസ്പദമായ സംഭവം. അമ്പലമുക്ക് ജങ്ഷനിലൂടെ പോകുകയായിരുന്ന ഇരുവരെയും അവിടെയുണ്ടായിരുന്ന ദീപക്കും അഖിലും പരിഹസിച്ചു. തുടര്‍ന്ന് ട്രാന്‍സ്ജന്‍ഡറിനൊപ്പമുണ്ടായിരുന്ന പ്രവര്‍ത്തക ഇതിനെ ചോദ്യം ചെയ്തു. തുടര്‍ന്ന് യുവാക്കള്‍ ഇവര്‍ക്കുനേരേ ആക്രമണം നടത്തുകയായിരുന്നു.
ആക്രമണത്തില്‍ പരുക്കേറ്റ ഇവര്‍ പേരൂര്‍ക്കട ഗവ. ആശുപത്രിയില്‍ പ്രാഥമിക ചികിത്സ നേടിയിരുന്നു. പരാതിയുടെ അടിസ്ഥാനത്തില്‍ പേരൂര്‍ക്കട എസ്.ഐ സമ്പത്തും സംഘവും ചേര്‍ന്നാണ് പ്രതികളെ പിടികൂടിയത്.
തുടര്‍ന്ന് കോടതിയില്‍ ഹാജരാക്കുകയായിരുന്നു.